فطور رايق..صباح رايق

فطوري رايق يعني صباحي رايق

هذا هو شعاري فالحياة!

 الريوق عندي مهم جدا جدا وأحب اتفنن واتلذذ فيه واسويلي أجواء

واذا عبيت الثلاجة بحاجات حلوة للريوق، لازم فالليلة اللي قبل ارقد من وهل من الوناسه ههههههه

فحبييت اشاركم بالاكلات اللي احب آكلها هالفترة عالريوق ^ـ^

Breakfast on Bed | ريوق عالسرير

تسوونها؟؟انا عمري ماسويتها احس فالجامعه جد الواحد مخه متروس مايلحق يفكر فهالاشيا ففكرة اني اسوي ريوق عالسرير كانت فلسته الاشيا اللي بسويها لم اتخرج + لسته الاشيا اللي بتسعدني فحياتي.

وفعلا نفذت الفكرة لكن عقب شهوووور.. المهم مايبيله شي بتحتاجون صينية وتحطون فيها الاشيا اللي تحبونها وجبذا تكون اشيا حلوة ومالحة.. عشان يكون ريوق ريوق بوساعه مش شي خفيف :P

واهني كنت اطالع مسلسل Hart of Dixie وانا اتريق..

الريوق عبارة عن:فول ،بيض وطماط،كروسون،خبز اسمر وفواكه والمشروبات كرك وعصير برتقال

طريقة عمل الفول:

المقادير: (نص علبة فول بالخلطة المصرية+نص بصل مفروم+طماطة وحدة مفرومة +نص فلفل اخضر مفروم+ملعقة طعام بقدونس مفروم+ملعقة طعام صلصة+ملح+فلفل أسود+كمون+زيت زيتون)
الطريقة: 
١-حطي فجدر صغير زيت الزيتون والبصل وحركيهم لين يصير البصل بني شوي
٢- حطي الفلفل الاخضر والبقدونس والطماط
٣- حطي الفول واهرسيه بالشوكة
٤- حطي الصلصة والملح والبهارات واخلطيهم وعقب سكري النار وغطي الجدر لين وقت التقديم.
٥- نصب فوقه شويه زيت زيتون عند التقديم.

!!!كروسون بجبنة فيتا،فواكه،عصير برتقال وكابتشينو نسله وماتذكر ليش حطيت التلفون فالصينية..بس ماظن باكله 

زوووم

هالكروسون كان عذابي لفترة طويلة

طريقة عمل الكروسون بجبنة الفيتا:

١- كروسون سادة نحط فيه (شرايح جبنة فيتا+شرايح خيار وطماط ورشة اوريغانو)

٢- هههه حسيتو انه مجبوس صح؟

ريوق سريع | Quick Breakfast

كروسون بجبنة الحلوم:

١- نشوي الحلوم

٢- نحط فالسندويج جرجير والحلوم المشوي وطماط وخيار ونرشه بشوية اوريغانو

٣- استمتعو..لذيييذ

ريوق خفيف | Light Breakfast

أحيانا تكونون مرتكبين جرايم عظيمة قبل النوم وتقعدون ثاني يوم بطنكم بينفجر لكن لانكم ماشيين على شعار فطور رايق صباح رايق تغصبون نفسكم عالريوق خخخخ 

ممكن تاكلون شي خفيف وحلو ومايغث مثل الخبز ومنتجات الحليب

يعني سلطة ^ـ^

المقادير:

جرجير+خس+خيار+طماط+فجل+زيتون اخضر بحشوة جبنة الفيتا+عين الجمل(اختياري)

وللتبيلة: دبس رمان وزيت زيتون

وبالنسبة للعصير: فراولة وليمون فالخلاط

ريوق مطعم | Restaurant Breakfast

مرة قمت من النوم وفخاطري اوملت لاديوريه :| او اي اوملت جي اصفر ولذيذ نفس المطاعم

بحثت فالنت عن French Omelet 

والحمدلله حصلت طرق حلوة فقلت اجرب اي وصفة..

والصراحة عقب ماكلت الاوملت حسيت نفسي كنت عايشة في عصر الظلمات انا وبيضي المحروق خخخخخخ

والله كنت اتحسب البيض اما يكون ني او يكون بني!!

اللي سويته كان لذيذ بمعنى الكلمة لدرجة اني كنت اكله بدون خبز وهالشي غرييب جدا علي لان مستحيل اكل بيض بدون خبز احس بلوعه بدونه كأني آكل شي مفصخ او حافي مادري الصراحة المهم كان شي يقرفني خخ

فحسيت بانجاز عظيم لم غيرت هالفكرة!

الحين بقولكم الطريقة ولو كنتو تعرفونها وصج انا توني طالعه من عصر الظلمات فاعفو عني هههه

لان لم قلت حق ريلي عن هالاكتشاف قالي واخيرا استوعبتي ان البيض اللي مب محروق حلو لووول

المقادير:

٣ بيضات+ملعقة زبدة+ ملعقة صغيرة ملح+فلفل أسود+خضروات اختيارية..وانا اخترت طماط وبصل وفطر

الطريقة:

 ١- اخفقي البيض والملح بقوة لين يصير قوام البيض أقرب للماي،تقريبا في دقيقة...او لين تعضلين

٢- حطي الطابي على فرن تكون درجة حرارته متوسطة

٣- حطي الزبدة لين تذوب

٤- اول ماتذوب الزبدة حطي البيض وبالشوكة سوي حركات سريعه من برع لين نص البيض لمدة ١٥ ثانية بس

" انا شوي خربطت فهالحركة لان خليت البيض يستوي شوي وانا اقعد اصور ..فضروري تكون الحركة سريعه"

٥- لم تشوفين البيض تماسك وفالنص مازال شوي سائل اقلبيه

٦- وعقب حطي الخضرة فنص البيض

٦-اقلبي نص البيض كأنج تلحفين الخضرة $ـ$ ههه استعبط اقصد نص دائرة

٧- وبيكون الاوملت جاااهز للأكل بس رشي عليه فلفل أسود حسب الرغبة

اقلبيه اذا تقريبا صار جي

Eatopia Restaurant | مطعم ايتوبيا

Eatopia Restaurant

مطعم ايتوبيا

من اسبوع تقريبا رحت مطعم ايتوبيا الموجود في ذا جيت مول (السلام)، وجد انبهرت ماتوقعته جي..احس كل مطابخ العالم في مكان واحد وهالفكرة أول مرة تكون موجودة عندنا فقطر (مشابهة للمطعم اللي في جاليريز لافييت فدبي)..صح عندنا مطاعم تقدم اكل منوع وعالمي..بس هالمطعم يقدم أكثر من اللي تتوقعونه..يعني أحس جو المكان أكثر من مجرد أكل..تقدرون تشوفونهم وهم يجهزون الاكل ويعرضونه جدامكم وتختارون اللب تبونه وانتو على الستيشن..وعندهم أكل عربي،ايطالي،هندي،سوشي وحلويات ويقدمون ريوق وغدى وعشى وكوفي. 

أول مرة رحته كنت ابي اتغدى يوم السبت وكان مزدحم جدا والجو حاار خصوصا صوب الدرايش (طاولات الطعام موجودة عند الدرايش) فبس خذت لفة وطلعت ماجربت شي ورحته يوم ثاني للريوق..

بالنسبة للريوق.. كان المطعم فاضي ولان مايطبخون شي فعالاقل الجو أفضل (أتوقع هالمشكلة ماراح تكون موجودة فالشتا)..المهم طلبت اوملت وعصير برتقال وريلي طلب حبتين كروسون..

وهذا هو المينيو

خذو لهم وقت لين مايجيبون المشروبات..وعقب ماجابوهم جابو الكروسون بس وانا قعدت انتظر تقريبا ١٠ دقايق ولا وصل طلبي وريلي خلص ريوقه وانا للحين انتظر وعقب ناديت الويتر قلت لها طلبي ماوصل..وعلى طول راحت تشوف شسالفه وخلال ٥ دقايق جابت لي الطلب..صج انبطت جبدي لان مش جاية مطعم عشان اتريق بروحي ><" لكن عموما الاوملت كان حلو فبرد جبدي شوي هيهيي 

اضطريت احط حبة الكروسون الثانية صوبي لان مافي مكان :| عالاقل المفروض تحطهم فصحن واحد

الاوملت مع طماط ومشروم

بس عندي ملاحظة ان طاولاتهم صغار وصحونهم كبار والاكل ضايع فالصحن وغير ان مافي مكان عشان احط شنطتي خير شر فحطيتها عالارض،وعقب غيرنا مكانا للكنبات وصج بعد الطاولة صغيرة للاكل نفسه بس عالاقل ماقطيت شنطتي عالارض وفي الطريق ..فأحس لو يهتمون أكثر من هالناحية وهالتفاصيل راح تتحسن خدمتهم وجودة شغلهم أكثر.

وغير الاكل عندهم جمعية صغيرة فيها سناكس وبهارات وصلصات ومشروبات وبعد اكسسوارات وادوات للمطبخ

بغض النظر عن الخدمة

المكان بشكل عام عجبني وابي اجرب اتغدى عندهم بعد واحس المكان مسلي الصراحة اكثر من قعدة مطعم عادية ^ـ^

فاتمنى لين ايي هاليوم تكون خدمتهم متحسنه أكثر

Contact info:

40206400

Twitter  |   Facebook  | Website

ديزني على الجليد..عرض رائع!

السلام عليكم

من فترة قلت لكم عن عرض ديزني على الجليد في هالبوست والحمدلله ان صارت لي فرصة ان اروح العرض وكان عرض جدا حلوو ويونس واول مرة احضر عرض عالجليد جي! مع العلم ان في ناس قالو لي قبل ان ديزني على الجليد اللي سووه العام  كان وايد احلى بس بعد انا بالنسبة لي كان ذي جدا حلو وماقدرت اسكر حلجي من الفرحة ههههه فمستغربة صراحة من الناس اللي قالو انه مش حلو :@ 

حضرت العرض في آخر يوم الساعه ٣ العصر، وكنت حاجزة تذاكر الVIP لان فيها فاليه باركنج وانا شوي متعقدة من مواقف مركز المؤتمرات من بعد حفلة التخرج فمابالكم الحين حامل وامشي طول هالمسافة -ـ- ..

بس الحمدلله كان اختيار موفق لان كان الحجز يشمل كنبات ومريحة للقعدة اذا الواحد يبي يمد ريله lol..

اهني اول مادخلنا

 سناكس قبل مايفتحون البوابة

 وعقب مادخلنا كان في اماكن لبيع الاكل والبوب كورن والكوتون كاندي والتصوير..بالنسبة لأكلهم كان في سندويجات ومقالي..

واول مادخلنا قاعة العرض عطونا اكياس فيهم مجلة وبوب كورن

وهذي صور من العرض

الافلام/الشخصيات اللي اطلعت فالعرض:

Mickey and his friends 
Cinderella step sisters
 The Little mermaid
Tangled
Beauty and the Beast
Brave

للاسف انا كنت اتحسب ان ممنوع نجيب كاميرات بروفشنال...وحسافة حسافة ان الكل جايب ومسموح عاااادي..فصوري ماكانت مضبوطة بعكس لم شفت صور الناس وجمالها بالكيمرا خصوصا ان العرض محتاج زوم ودقة وهيك هيهيهي
فان شالله المرات الجاية لازم اسأل قبل اي عرض اروحه ^ــ^

وفي شي بعد..السنة الجاية في ديزني عالجليد شخصيات فلم فروزن راح يشاركون بعد *ـ* و ن ا س ة !

اللي راحو العرض يعطوني رايهم ^ـ^

We're Expecting!!

و أخييرا 

وأخييييييييرا قدرت اقولها فمكان عام وأخيييراا!!!

Happy and Over the Moon :D

أنا حامل ولله الحمد..وبغض النظر عن اني هادية فالموضوع ومب متصرقعه بس فكرة البيبي اللي ينمو داخلي بتذبحني احس ماقدر اعديها واعيش هالفترة بس اعد الايام متى اخلص! لازم لازم ادونها فمذكرة لان الوقت يمشي بسرعه ومتأكدة ١٠٠٪ لم اربي بالسلامة كل هالفترة بتكون رمشة عين بالنسبة لذاكرتي! -نفس ٥ سنين دوام فالجامعه خخخخخخخ مايسوون عندي ثانية الحين- 

المهم فقررت استخدم مدونتي اني افضفض فيها وفنفس الوقت افيد للي يحب يستفيد لان شخصيا واايد واايد استفدت من المواقع والمدونات والفلوجرز اللي يكتبون عن مشاعرهم او يعطون تحديثات اسبوعية بتطورات الحمل ويعبرون عن اللي فقلبهم وحتى لو كانت افكار عبيطة شوي! بس احس شي وااايد حلو ان يوم من الايام ارجع اقرا واضحك او اصيح على هالفترة ^ـ^

راح اكتب اشيا منوعة..افكاري..نفسيتي..اهتمامي في صحتي..استعدادي للبيبي والولادة وتجهيزي لغرفة البيبي وبشوف عقب الولادة اذا فضيت ولي خلق راح اكمل سواء اهني او في الانستاغرام..وطبعا مش اقصد ان البلوق راح يتحول ١٠٠٪ لمواضييع متعلقة بالحمل والولادة..لا بالعكس راح يكون مكس بس بالاشيا اللي تعجبني بشكل عام..واكيد البيبي بيعجبني ومايصير اتجاهل وجوده في حياتي واللايف ستايل مالي :P  

حاليا انا في الشهر الرابع ولحد الحين ماعرف بنت أو ولد فماجهزت ولا خذت ولا شي، نساتي خفيفة الحمدلله.. اول ٣ شهور بالنسبة لي عبارة عن رقاد وارهاق وأكل بس وعقب فالرابع صرت اوكي واموري تمام لكن لم بدا البطن يطلع شوي بدت عندي شوية آلام في الظهر والريل -ـــ- شالسبب؟؟مادري! وبشكل عام من حملت بس اتضايق من الروايح القوية وتخليني اعطس عطسة تسدحني واقول وراها (بل) بدال الحمدلله ....استغفر الله لان احس عطسة تطلع المصارين :$ 

بالنسبة لملابسي؟؟ الخلاصة ان شكلي بييب كرتون وجي بحذف كل الملابس اللي فالكبت حذفة وحدة لان من اول ماحملت خلاص ماستحمل اي شي يرص علي وقاعدة شوي شوي اشتري وافصل باللي احتاجه..وبالنسبة لملابس العيد؟ فيني بكاء داخلي لاني مب قادرة احصل اشيا على ستايلي بس الحمدلله على كل حال. 

مواعيدي؟ انا كنت اتعالج في مستشفى النساء والولادة عشان احمل واول ماحملت تأكدو ان اموري طيبة (بحكم ان عندي اسقاطات سابقة) طلبت تحويل لمستشفى الوكرة بما اني ساكنه فالوكرة وسمعت انه مش زحمة و٥ دقايق من البيت للمستشفى ومن التعب والارهاق احيانا مابقدر اطلع مشوار طويل للدوحة! بس لحد الحين محتارة بالنسبة للولادة.. اذا فالوكرة او الدوحة  *ــ* فالله يستر 

لكن بالنسبة للالتراساوند اتابع في عيادة عدنان عند الدكتورة فدوى ..ادري يمدحون عدنان بس مايهمني انا اهم شي عندي ان فدوى ماعندها زحمه...ههههه حسيتو اني سودانية وادور الطرق الاسهل فكل شي؟ لوول

لا بس صج بالنسبة لخبرتي فالعيادات الخاصة اعتبرهم كلهم خرطي فماتفرق معاي وايد :P 

بس وناسة فعيادتهم يعطونكم التراساوند فيديو وعاد كل كمن يوم انا متسمرة جدام التلفزيون اشوفه كأن اطالع فلم لووووول فله خخخ

أكلي  والله تجيني آلام تموتني اذا ماكلت كل ساعتين احس مصاريني تتقطع فجد وايد اكل :( (قاعدة اكل طماط وانا اكتب) يعني بتاع كلو مافي جدول معين لأكلي..بس الشي الحلو اني من حملت اشتهي السلطات والفواكه بشكل مش طبيعي..خصوصا السلطات احس اني اكل جوسي برغر يقطررر لذييذ نم نم ... وخلال علاجي للحمل كنت اشتهي ورق عنب وملفوف بشكل مش طبيعي ولم اكتشفت اني حامل احس بموت اذا ماكلت ورق عنب ييممممممممم يمممممممممممم.

نفسيتي؟ اول ثلاث شهور كانت النفسية دمار شامل وكل ماقعد من النوم بس اتم منسدحة وافكر فاشيا تضايق واصيح عليها (اجيب النكد لنفسي يعني لوول) وبس احس النفسية تجي من باب ان الوحدة تحس نفسها مختلفة أو كائن فضائي أو ان خلاص قربت نهاية العالم..مادري يعني احس كل شي اوكورد وتفكيري تغير فجأة..فصرت اتنرفز اكثر..فالبداية احس مثلا اذا فمكان عام وحد وقف جدامي من كثر ماانا منفسة ودي اكفخه بس ماكفخت حد الحمدلله...لكن الحين لم تخطيت هالمرحلة شوي وتأكدت انه حمل ثابت شوي تغيرت نفسيتي للافضل وماراح اكفخ حد ان شالله :)

واذا اي وحدة حامل او توها مربية وتتكلم عن تجربتها او عندها عيال احس عادي اصييح من كثر ماانا مقدرة وفخوره فيها وفالانجاز اللي سوته..جد احترامي للحمّل والامهات تغير ١٨٠ درجة! 

بشرتي؟ بشرتي تغيرت وصارت جافة و متقشرة وحساسة وتطلع لي حبوب مينونة ماتخف :| 

لحد الحين ماتفرغت ان اشوف حل لهالمشكلة لان استخدم منتجات العناية اللي عندي وابي اعطيها وقت واذا شفت ان مرت فترة وكلش ماتغير شي ناوية اغير الست اللي عندي وخصوصا ابي اشوف حل للجفاف والتقشر..فاللي عنده فكره عن منتجات ممتازة يفيدني..وجزاه الله الف خير..يمكن اطرش له ورق عنب *ــ*

وبس هاي اللي فبالي حاليا 

وان شالله راح يكون في بوست ثاني بمعلومات ثانية من ناحية كتب الحمل وبرامج الحمل.

وعلى فكرة

اموووت على الناس اللي يشاركون بتجاربهم ويفيدوني وبس يعني يعلقون كملاحظات عشان جد محتاجة اوادم مرو بهالتجربة يحسسوني اني طبيعية..

فاللي عنده اي شي يقوله لايتردد يقوله اهني او في الانستاغرام As you like

واللي تعالج عشان الحمل وحابه تعرف اشيا عن تجربتي بما اني ظليت ٤ سنين ف١٠٠٪ حاسة فيكم واذا حابين اتكلم او نتكلم عن هالشي اهني او عالايميل عطوني خبر لتفاصيل اكثر عن تجربتي ^ـ^ 

Bye,

Mommy to be :P

قهوة مع فوز الفهد The Real Fouz

الانستغرامر المشهورة فالكويت والخليج فوز الفهد The Real Fouz راح تكون موجودة في الدوحة في افترنون تي مخصص ان تعطي فيه نصايح للمكياج..

لم قريت ان القعدة قعدة قهوة وجي حسيت ان الجو ماراح يكون رسمي أبد والاغلب انه تعارف وسوالف ونصايح للمكياج بشكل عفوي وتقهوي .. شي حلو صح؟ 

في قروبين لمدة يومين

الأول يوم الجمعة تاريخ ٢٦/٩

والثاني السبت تاريخ ٢٧/٩

المكان:

فندق الشعلة

الوقت:

٥ مساء

سعر تذاكر الدخول:

 ٣٥٠٠ 

(مبلغ التذكرة غير قابل للاسترجاع)

لحجز التذاكر:

فرجن (فيلاجيو،اللاند مارك،اللؤلؤة)

موقع فرجن

ديزني على الجليد في مركز المؤتمرات

السلام عليكم

الاسبوع الجاي ان شاء الله راح يبتدي عرض ديزني على الجليد ولمدة ٤ أيام

من الاربعا ٢٤ سبتمبر إلى السبت ٢٧ سبتمبر

وهالعرض ثاني عرض لديزني على الجليد في قطر

Disney on Ice

Rockin' Ever After

تنظيم قاعة العرض

أسعار التذاكر:

Royal - 2000

VIP - 1000

Gold - 475

Silver - 275

Bronze - 175

المميزات اللي تحصلون عليها اذا حجزتو الرويال أو الVIP

- مقاعد قريبة من الستيج

- مدخل خاص

- فاليه باركنج

- مكان مخصص لطلب الطعام قبل أو أثناء العرض

-كيس ديزني على الجليد فيه كتيب تذكاري وبوب كورن 

* وبالنسبة للأطفال اللي عمرهم تحت السنتين وراح يقعدون فحظنكم مايحتاج تشترون له تذكرة (هالشي لكل درجات المقاعد)

أيام وأوقات العروض:

مكان العرض: مركز المؤتمرات

وتقدرون تشترون التذاكر من فيرجن (فيلاجيو، اللاند مارك ، اللؤلؤة ، موقع فرجن اونلاين)

Hi 5 Tour in Doha!

من يتذكر برنامج الاطفال "هاي فايف"؟

كنا نشوفه على نيكولودين ومازال عرضه مستمر عالقناة

انا كنت احبه لم كنت صغيره *ـ*

وعلى بداية الشهر الجاي الفرقة راح تجي قطر وبتقوم بعرض حفل موسيقي في مركز المؤتمرات من خلال عرضين ولمدة يومين

الجمعة تاريخ ٥/٩/٢٠١٤

السبت تاريخ ٦/٩/٢٠١٤

والعروض بتكون الساعة ٧ مساء

تقدرون تحجزون التذاكر من محلات فيرجن (اللاند/فيلاجيو/اللولوة) أو من موقعهم على هالرابط   

مركز مهارات للتدريب

مركز "مهارات" للتدريب يقدم لكم دورات منوعة تنفع للكبار والصغار مثل الطبخ والخياطة والتطريز والفنون المختلفة، اللي حبيته في دوراتهم انها منوعة تنفع ان الوحدة تروح مع امها وخواتها او صديقاتها وكل وحدة فيهم راح تحصل شي مناسب لميولها..سواء وحدة حابة تنمي مهاراتها او تتعلم شي جديد او تقضي وقت فراغها فشي مفيد!! 

راح تبدأ الدورات في المركز تاريخ ١٥/٩ لكن لحد الحين مافي تواريخ مؤكدة لان الجدول على حسب الطلب وعلى حسب العدد..

في دورات معينة ممكن تسجلون فيها وتبدؤون على طول حتى لو بروحكم في الكلاس وفي دورات معينة مطلوب فيها عدد معين من المشاركات!

:هذي معلومات دوراتهم

وانصح كل بنت نصيحة قلبية ان ماتخلي سنه تعدي عليها

 بدون ماتتعلم شي جديد لو كانت مشغولة ولا عندها ضغوطات حاولو قد ماتقدرون تدخلون هالاشيا فحياتكم لانها ترفع من قيمة الوحدة وثقتها في نفسها..وترى احنا فقطر عشنا سنين طويلة مش متوفرة عندنا هالنوعية من المراكز بهالمواصفات فتخيلو السنين اللي ضاعت من عمرنا ماانتجنا فيها أي شي وماطورنا من شخصيتنا..ولو نتكلم عن آخر ثلاث سنين اتوقع راحو فشبكات التواصل الاجتماعي والسوق والمفوشر والسفر والتحندي والاكل (خطين تحت الاكل لي انا هههههه) !! ترى بس لاعت جبدنا كم سنه اللي فالطعش بتكبر وبتدخل العشرين واللي فالعشرين بتدخل الثلاثين والاربعين والخ وبعدين بنرجع نشوف ورى بنكتشف ان احنا استهلكنا أكثر ماانتجنا وترى هالشي راح يسبب اكتئاب وتحطم نفسي فالمستقبل لوول ... ادري تفلسفت وايد بس فلسفتي حقيقة واقعية ولازم كل وحدة تلحق نفسها ^ـ^

الموقع

http://www.maharatqatar.com

التلفون:

44442080 /  66965558

Twitter   /  Instagram

خريطة المركز