Alnouf Style: نوفمبر 2012

الخميس، 29 نوفمبر 2012

بطاقة الشايع..الهدية المثالية!

بطاقة الشايع اعتبرها هدية عجيبة..خصوصا اذا كنتو محتارين شنو تهدون اللي تحبون! مثلا لو كانو يعشقون بنك بيري او ستاربكس..ماظن ان من السهل تعطونهم هدية من هالمحلات! لكن تخيلو تعطونهم رصيد في هالمحلات يشترون منهم كثر مايبون..وانا متأكدة انهم بيتذكرونكم في كل عملية استخدام للبطاقة.

وين يقدرون يستخدمون البطاقة؟

في جميع المحلات اللي بوضحها بعدين،ويقدرون يستخدمون البطاقة أكثر من مرة لأن هي فيها رصيد معين..ويقدرون بعد يضيفون رصيد داخل البطاقة اذا حبو!

صلاحية البطاقة؟

البطاقة صالحة للاستخدام لمدة 12 شهر من آخر عملية اضافة للمبلغ، فاذا بتهدون حد تأكدو انكم ماتشترونها قبل المناسبة بفترة طويلة.

حد المبلغ في البطاقة:

مافي حد معين للبطاقة،تقدرون تحطون أي مبلغ!

كيف يعرفون الرصيد المتبقي في البطاقة؟

الرصيد المتبقي بيكون مكتوب في فاتورة الشراء

من وين تقدر تشتري البطاقة؟

من جميع المحلات اللي تقدر تستخدم البطاقة فيها

المحلات

البطاقة مناسبة لـ:

العيد،النجاح،أعياد الميلاد،بداية الاجازة،الخطوبة،بدون سبب لشخص تحبه وتعزه

كيف تقدمونها؟

ممكن تقدمونها مع هدية ثانية

أو مع باقة ورد

شرايكم بالفكرة؟

وشرايكم لو حد عطاكم هالبطاقة؟

شخصيا انا عاجبتني وايد وايد..لان أغلب المحلات الموجودة هي محلات نحتاجها بشكل شهري أو يومي!

Share it

السبت، 24 نوفمبر 2012

مكرونة اللحم المفروم

المقادير:

-مكرونة حجم صغير

-صحن لحم مفروم(استخدمت غنم)

-بصل

-ثوم

-نص كوب بقدونس مقطع

- نص كوب جلجلان مقطع

-٤ حبات طماط(اخلطيهم في الخلاط مع شوية ماي وملح)

-حبة جزر (مكعبات صغيرة)

- حبة فلفل رومي(مكعبات صغيرة)

- ملعقتين صنوبر

-قوطي صلصة

-جبنة موزاريلا

البهارات (ملح-فلفل اسود-كمون-كركم-بابريكا او فلفل بودر) وتقدرين تضيفين اللي تبين!

- فتات الخبز((اختياري))

للكريمة:

-٤قواطي قشطة

-ويبنج كريم حجم متوسط

-٦ حبات جبن كيري (او ٦ ملاعق جبن قلاص)

-ونحط المقادير في الخلاط ونحط شوية ملح ونخلط.

الطريقة:

اهم شي في هالاكلة هو اللحم المفروم ، لازم تتخلصين من ريحته لان مهما حطيتي من البهارات ريحة الزفرة ماتروح :|

بس عندي الحل الحمدلله

١- حطي اللحم في مشخلة وغسليه لين يروح الدم ويتصفى من المشخلة.

٢- حطي قدر صغير على نار متوسطة وحطي فيه اللحم المفروم

٣- راح تلاحظين ان في ماي ودهن يطلع من اللحم (هذي الزفرة بحد زاتها

هعهع)

٤- بتحتاجين تشخلين اللحم عشان يروح الماي وترجعينه في القدر لين تحسين ان الماي مايطلع وايد واللحم نشف وحطيه على جنب.

((انتبهي ان اللحم ماينطبخ او يصير بني؛ الفكرة ان نشفه من الماي والدهن بس!))

في قدر متوسط ثاني ،سوي حمسة اللحم:

١- حطي زيت وعقب احمسي البصل والثوم لين يصير بني فاتح.

٢- حطي اللحم وحركي.

٣- حطي البقدونس والجلجلان واخلطي عدل لين تحسين ريحة البقدونس والجلجلان غطت على زفرة اللحم "نص دقيقة"

٤- حطي قطع الجزر والفلفل والصنوبر وحركييييييي.

٥- حطي الملح والبهارات..وبين كل نوع اخلطي شوي عشان مايصير اللحم يابس.(كوني كريمة في البهارات هع هع)

٦-حطي قوطي الصلصة واخلطي.

٧- حطي عصير الطماط واخلطي.

٨-غطي القدر وخليه على نار هادية لمدة ربع ساعه ((مع التحريك كل ٥ دقايق))

٩- في هالوقت اسلقي المكرونة.

١٠-جيبي صينية بايركس عميقة وحطي طبقة من المكرونة وحطي فوقها موزاريلا وخلطيها شوي.

١١-وزعي اللحم المفروم عالمكرونة

١٢-حطي طبقة اخيرة من المكرونة وحطي موزاريلا واخلطيه شوي.

١٣- صبي الكريمة اللي خلطتيها وحطي عليها موزاريلا وعقب انثري فتات الخبز ودخلي الصينية في الفرن عشان تتحمر من فوق بس.

وفيه العااافية

الخميس، 22 نوفمبر 2012

مهرجان المحامل التقليدية [ صور ]

رحنا رحلة مع فريق التصوير الفوتوغرافي عشان نطبق اللي تعلمناه،

وكانت وجهتنا كتارا يوم السبت .. عشان نصور في مهرجان المحامل التقليدية

وهذي صوري اللي قدرت اصورها :)

الأربعاء، 21 نوفمبر 2012

الأسبوع الاول: دورة التصوير

بديييت الاسبوع اللي طاف دورة تصوير حلوة، في البداية أنا عندي فكرة عن التصوير وأعرف معرفة اعتبرها جيدة..لكن من بعد ممارسة 6 سنين حسيت ان محتاج تطوير لمهارتي ويمكن هذا الوقت اللي المفروض انتقل لمرحلة جديدة :) ، (هههههه وايد صح)

وفعلا هالدورة ماخيبت ظني ، هي نفسها اللي يقدمونها في فرجينيا لكن هذي يسوونها في آنيما جاليري في اللؤلؤة.

صور من آنيما جاليري لاونج، اللي ندرس فيه:

وفي الويكند اللي طاف خذنا الاستاذ لكتارا (مهرجان المحامل التقليدية) عشان نطبق اللي تعلمناه وعشان يساعدنا في التصوير في الحدث بين الزحمة والحشرة،والحمدلله حسيت ان قدرت اطلع بنتايج حلوة ومختلفة عن باقي صوري. وبعرض الصور في البوست الثاني :)