الحمدلله الذي تتم بنعمته الصالحات كان يوم الاربعا ٢١/٥/٢٠١٤ حفل التخرج اللي كان شي ماينوصف صراحة! فعلا شعور رائع بكل ماتحمله الكلمة من معنى..كنت اتحسب لم اخلص الامتحانات والمشروع راح اكون مرتاحة من موضوع الجامعة لكن يوم الحفل فعلا اكتشفت ان هذي الفرحة الحقيقة..فرحة الخريج مش باليوم اللي يخلص فيه آخر امتحان بل اليوم اللي يحتفل فيه بانجازه الكبير طول هالسنين ويتكرم ويستلم الشهادة ويشوف عيون هله الفخورة وابتسامتهم العريضة...والله بس هالشي يكفي وينسي الواحد كل تعب السنين، وعلى طاري تعب السنين... ترى في هاليوم ماتذكرت الا الايام الحلوة في الجامعة..بقدرة قادر كل الايام الصعبة والتعيسة انمسححتتت ماقدرت حتى افكر فيها وبكل صراحة التخرج نفسه ماراح يكون له حلاة اذا جا بدون جهد وتعب!! فعلا الحمدلله الحمدلله اللي قدرني اني انجز هالفصل من حياتي والله يوفقني ويوفق الخريجات جميعا ^ـ^
في اشيا فبالي حبييت اذكرها اهني كمذكرة لي وكمعلومات عامة للخريجات في المستقبل..ماعندي فكرة اذا النظام مشابه لباقي الجامعات برع قطر او لا بس لعل وعسى تستفيدون بأي طريقة عالاقل تتسلون :P
نصايحي لخريجات المستقبل هي:
البروفة البروفة بكل بساطة عبارة عن "برزنتيشن" فيه تعليمات للي بيصير في الحفل! جهد واضح من الجامعه لانهم يكونون منظمين وكل شي بس مازلت احس ان محتاجين ضبط اكثر عالبنات! لووول
* صوري كل شي..يس يس ادري ان احنا مش مقصرين بالتصوير..بس لازم نصور كل شي له علاقة بآخر كورس او بالتجهيز لحفل التخرج ويوم الحفل نفسه... اللي لاحظته اخر كورس (خريف ٢٠١٣) كان ماشالله كورس جهد واجتهاد متواصل منذ البداية..بس الحمدلله بالتنظيم وبالتوكل على الله كل شي يتيسر..عشان جي انصح ان نصور قد مانقدر فهالفترة حتى لو النفسية مش عال العال...عشان بعدين نكون لنا ذكرى لهالايام، وبالنسبة للحفل يسمحون لنا نصور على راحتنا ولكن طبعا مع احترام خصوصية باقي الطالبات ^ـ^
* لبس التخرج اللبس عبارة عن روب قماشه مثل العباية ومعاه كاب، بالنسبة للروب في قياسات من سمول الى اكس لارج..ويسمحون لكم تقايسونهم وفعلا انا قايست السمول بس طلع بالضبط على قد جسمي وماحبيت هالشي فخذت ميديم ولو انه وايد طويل واليد وسيعة وحزتها قلت عادي بعدله فالخياط وهم قالو لنا ان الخياط راح يعدل لنا اي شي نبيه..لكن تخيلو لم رحت للخياط صوب سوق الديرة (وكاتبين عالعلبه انه في النصر) مادري ليش :/ والخياط طلع اي كلام والهندي اللي فيه مايفهم خير شر وجدا وقح في طريقة كلامه وقالي ان اللي اشتغل على اروابنا مسافر فطلعت من عنده لان مستحيل اتعامل مع شخص بهالوقاحة (مادري شلون جامعتنا تعاملت معاه!!) ورحت لخياط ثاني وللاسف قالي ان قصة العباية ماتسمح له ان يضوق لي صوب اليد :/ فتوهقت حزتها وماقدرت الا اني اقصرها.... المهم ليش انا تكلمت فهالموضوع؟ لان انا قدرت امشي حالي...لكن! مش اي وحدة راح يركب عليها فانصحكم تستلمون الروب اول مايعلنون عن وقت استلامه وتجربونه في نفس الوقت واذا مش اوكي تحاولون تاخذونه للخياط يعدله او اذا القياس سيء تفصلون غيره اذا ممكن... يعني انا صراحة توهقت فهالشي ووقتي كان ضيق وكنت مشغولة فماقدرت ارتب الروب.... احم وبالنسبة للكاب ايضا معوق وبتحتاجون ترشون عليه ماي وتكوونه مرة ثانية عشان يضبط هيهيهي
*كعب أو فلات؟ كان هالسوال يشغل بالي خصوصا ان صديقتي فالمدينة التعلمية قالت ان وقفوهم واايد فكان الكعب جدا متعب...لكن بالنسبة لجامعتنا قاعدين طول الوقت وماراح تتحركون الا لاستلام الشهادة فانصح بالكعب وبشدة وخصوصا انه اكشخ لهذي المناسبة ^ـ^
*كافئي نفسج! كنت اتحسب ان هالمناسبة عبارة عن شور من الهدايا..لكن في الحقيقة اثمن هدية راح تجيج اللي راح تجي منج لان محد غيرج فاهم التعب ولا حد غيرج درس هال٤ او ٥ او ٦ سنين.. كنتي تتضايقين وكنتي تتعبين واحيانا كنتي تحتاجين شخص يرفع معنوياتج..لكن في هذي اللحظة صراحة كل خريجة لازم تكافئ نفسها بشي تتمناه لان هذا هو الوقت اللي فعلا راح تستحقين فيه اي شي وبجدارة!
شعور جميل ماودي ينتهي *ـ*
شكرررا لجميع المهنئين وكل اللي دعو لي وكل من مشى معاي فكل لحظة هلي وصديقاتي مشكوريين جدا احبكم احبكم ^ـ^
