Activities in Singapore Pt2 - Universal Studios

السلام عليكم

هذا الجزء الثاني من الانشطة اللي سويناها في سنغافورة وراح اتكلم عن يونيفرسال ستديوز الموجود في جزيرة سينتوزا..طبعا عقب ماقضينا ٥ ايام في سنغافورة اخر يومين رحنا سنتوزا وغيرنا الفندق واكتشفت ان سنتوزا وايد قريبة تقريبا ربع ساعه لكن مليانه انشطة فتستحق ان الواحد يحجز فندق فيها،

بالنسبة ليونيفرسال ستديوز مقرهم الرئيسي في فلوريدا وبعد في بارك ثاني في لوس انجلوس واليابان ورحت اللي فلوس انجلوس السنه اللي طافت وكان تحفة شي ماينوصف..فتشجعت جدا ان اعيد التجربة في سنغافورة.. وقريت بعد ان راح يفتحونه في كوريا ودبي وروسيا والصين

يونيفرسال ستديوز بكل بساطة عبارة عن ثيم بارك فيه العاب لها ثيمات معينه لافلام وبرامج هولييود الخاصة بشركة يونيفرسال، وفي الثيم بارك تحصلون شخصيات تصورون معاها أو أكشاك تبيع حلويات او مشروبات على الشخصيات اللي تحبونها..وبالنسبة للالعاب في العاب ثري دي،والعاب للعايلة أو للكبار بس.

وكان الثيم بارك مقسم لثيمات مثل ماذكرت قبل وهي:

Hollywood

New York

Sci-Fi City

Ancient Egypt

Lost World

Far Far Away

Madagascar

كانت تذكرتنا ليومين فخصصنا يوم ندور البارك كامل واليوم الثاني نكرر الالعاب اللي عجبتنا ونشتري تذكارات 3 >

Activities in Singapore - Pt One

الخيارات الترفيهية في سنغافورة لاتعد ولاتحصى، واحس انها تناسب كل الاذواق سواء حبيتو انشطة داخلية أو خارجية…أشيا طبيعية أو تاريخية أو حديثة..

كانت عندنا خيارات كثيرة قررنا ننوع ونختار شي من المتاحف وشي من الحدائق وهكذا ^ـ^

اول وجهة كانت لحديقة حيوان سنغافورة،رحنا لها عن طريق الاندرغراوند واخر محطة وقفنا فيها ركبنا باص يودينا للحديقة دايركت..كانت رحلة طويلة شوي في الباص فققررنا فالرجعه نرجع بسيارة واكتشفنا ان بالسيارة اريح وماطولنا^ـ^ 

حديقة الحيوان مالتهم ماشالله كبيرة وفيها كذا نشاط…مثلا رحلة فالنهر والسفاري ….ولاحظنا ان اغلب الحيوانات مش في قفص والفاصل بينا وبينهم اشيا طبيعية مثل بحيرة او تله بس..صج شي يخرع بس ماشالله حيوانات مؤدبه ههههه المهم انا استانس في  حديقة الحيوان لان اكتشف الحيوانات عالحقيقة وانا قبل ماكنت اشوفها الا في الرسوم المتحركة وبعد في اوقات معينة يسمحون لكم تحضرون عشان تشوفونهم وهم يأكلون الحيوانات

وهذي صور من الحديقة..

متحف سنغافورة

المتحف فيه معرض مؤقت وفيه معرض دائم عن تاريخ سنغافورة من قديم الزمان..ووايد حبييت قسم تاريخ سنغافورة لان كان منظم وتمشون فيه بالتواريخ وتشوفون التغييرات اللي صارت في سنغافورة وشلون كان تطورها عبر السنين ..والمتحف كأنه قصة عن المجتمع السنغافوري قبل وعن قصص الناس اللي غير وأثرو في تاريخهم.

الحديقة اليابانية

ومعروفة بعد باسم Jurong Gardens

هي حديقة مصممة بتصميم ياباني في السبعينات ويربط الحديقة جسر لحديقة ثانية اسمها الحديقة الصينية…حديقة حلوة للمشي وللخضرة وفيها معالم لمباني يابانية وفيها بحيرات صغيرة بس مليانه سحالي *ـ*

رحلتي لسنغافورة

قضيت اسبوع في سنغافورة وكانت رحلة حلووة وخصوصا ان هذي اول مرة اروح دولة في شرق اسيا! فكانت رحلة استكشافية ممتعه وشيقة بكل حذافيرها! اول انطباع لي ان سنغافورة فيها قوانين ماتتخيلونها..لدرجة ان قبل ماننزل من الطيارة حاطين لنا ان اللي يدخل علوج حاله حال اللي مدخل ادوات حادة او مخدرات!! المهم وعندهم بعد ممنوع تاكلون او تشربون في الاماكن العامة ماعدى المطاعم طبعا هعهعه…وماشالله صج بلادهم نظيفة ومجمعاتهم وكل مكان ^ـ^ كنت شوي مستغربة ان شاللي حادهم ينفذون القوانين بحذافيرها..بس عقب اكتشفت ان لكل غلطة في الاماكن العامة يدفعون غرامة.. هيهيهي 

الجو: سنغافورة قريبة من خط الاستواء فمناخها يكون حار غالبا...بس لي شخصيا كأنه صيف الدوحة فوايد تضايقت من هالنقطه لان كان صعب ان امشي وايد بسبة الجو الحار...والواحد لم يبي يسافر يبي يطلع ويتمشى مب كل دقيقة يدور له مكان يرتاح فيه او احيانا كنت ارجع الفندق عشان اتسبح وابدل من شده الحر :"( ...فانصح اللي يبي يروح يدور ابرد الشهور...وابرد شهورهم تكون درجة الحرارة فيها ٢٥-٢٧ تقريبا.

الأماكن السياحية: سنغافورة مليانه انشطة ممتعة للشباب والعوايل الكبيرة او الصغيرة،مثل الحدايق،المتاحف،الالعاب..راح اتكلم عن الاشيا اللي سويناها في بوست ثاني.

المطاعم: اول يوم في سنغافورة ماحطيت شي فحلجي غير فرابتشينو!!! لان ماحصلت شي ينأكل غير الاكل الاسيوي(ياباني،صيني،سنغافوري) وانا ماحب اكلهم :( تضايقت فالبداية من هالشي لكن ثاني يوم بديت اكتشف المطاعم والكوفي شوبات وصج اكتشفت اشيا فظييعه ادمنت عليها..وغالبا هالمطاعم تكون بادارة سنغافورية بس تقدم أكل امريكي او فرنسي وبخصص بوست اتكلم فيه عن اكلهم..وانصح اللي بيروح لازم تكون عنده فكرة واضحة عن المطاعم ويقرا فالنت عنهم..الا اذا تحبون الاكل الاسيوي النيp: 

السوق: سوقهم يطير العقل!! مليااان بوتيكات عالمية نعرفها لكن بضاعتهم الاسيوية احلى بوايد..بتحصلون بضاعه من هونج كونج والصين واليابان..ماركات خاصه فيهم سواء جودتها عاليا جدا او عادية وحلوة..والمجمعات عندهم ماتنعد عالاصابع..يمكن الشارع الواحد تحصلون فيه ١٠ مجمعات، المهم خلاصة الموضوع ان بالنسبة لي سوقهم احلى من امرييكا بواايد لان عندهم اللي في امريكا واوروبا واضعاف هالقارتين عندهم من اسيا...الزبدة سوقهم يطير العقل لوول ..

صور: