الثلاثاء، 20 فبراير 2018

سحر الترتيب!

بقول لكم عن كتاب غير في حياتي ونظرتي للأشيا من حولي حرفيااا!! اذا ماكنتو تؤمنون آن في كتاب بيغير في حياتكم اذا قريتو The Life-Changing Magic of Tidying Up لليابانية ماري كوندو راح تغيرون رايكم فهالشي...بدون مبالغة راح يتغير تفكيركم على طول !

في الحقيقة انا سمعت عن الكتاب اول مانزل وكنت اقرا ريفيوز او اشوف مقاطع فيديو لطرق ترتيبها بس مافي شي شدني او شجعني أطبق...قلت اكيد هالكتاب أو هالأفكار راح تكون حالها حال الكتب والمقالات والفيديوهات اللي قريتها في طرق الترتيب وعمرها حياتي ماترتبت هههه ..

حقيقة عني: أموت في (الأشياء)..عندي حب للشراء بشكل مش طبيعي..وفوق هذا حب الاحتفاظ بالاغراض حدث ولا حرج ممكن تنهارون لو بس عرفتو شنو كنت اجمع واخزن..جذي مثل الاطفال احب يكون عندي كولكشن من كل شي..علب حلويات..فواتير..تاغز.. دفاتر..ستكرات...لستة ماراح تنتهي لاشيا مااستخدمها ومالها داعي..لكن احتفظ فيها بحجة "الذكرى" آو "بحتاج ارجع لها" ... وغير هذا طبعا الملابس والاكسسوارات والمواعين الخ الخ.. 
وكنت دايما اقول عادي عادي بشتري علب وبنظم..بسويلي خزانة حق هالاشيا وبشتري منظمات ايكيا وكل شي بيترتب..بس للأسف عمرها اغراضي ماترتبت طول عمري اضيع وقتي عشان القى اللي فعلا احتاجه بين الادراج المعفوسة والاغراض المدعوسة.

سياسة ماري كوندو العجيبة ان تطلب منك تتخلص من أي شي (ماتستخدمه) و (ماتحبه) ! 
لو تركزون فهالنقطتين..... ياويلي! هل فعلا احنا نستخدم كل شي عندنا كل يوم او حتى مرة فالشهر؟ غالبا لا!
خل نكون صريحين مع بعض احنا غالبا نشتري أكثر من مانستهلك بالذات فهالفترة واحنا نتعرض لمواد الفاشنيستات والمشاهير ومنتجاتهم....
المهم وجد بديت اطبق خطواتها فالملابس ومنتجات التجميل..وللاسف فعلا اكتشفت كمية ملابس مش طبيعية..اشيا قديمة واشيا حلوة بس مالبسها لانها مدعوسة من كثر الملابس..وغير الاشيا اللي انطر اني اضعف عشان ارجع البسها وغير الملابس اللي تذكرني بلحظات معينة واللستة تطول!
بس من عقب ماقريت كتابها الصراحة قلت خلاص يااني أغير هالوضع الحين او اظل للابد جذي! وفعلا طبقت كلامها لانه فعلا مقنع.. بالذات سياسة ان ماله داعي نمتلك شي احنا مانستخدمه او مانحبه ومايسعدنا!

وصج اضطريت اتخلص من ملابس شكثررر والله ماتتخيلون لم طلعتهم كلهم وقعدت اشوف قطعه قطعه قلبي عووورني ان ليييييش كنت اشتري بدون تفكير!! ليششش ماكنت اقدر القطع اكثر واستهلكهم اكثررر بالذات القطع اللي تروح موضتهم!!
يعني طريقتها فالترتيب مب بس غيرت شكل خزانتي..حتى طريقة تفكير عقلي ..مسألة الشراء عندي صارت صعبة..مااخذ اي قطعة الا انا م ي ت ة عليها ومتأكدة ١٠٠٪ اني راح البسها..لان ماعندي استعداد ارجع اعيد حركة ان اجمع ملابسي كلها مرة وحدة عالارض وامسك قطعة قطعة!! لاني قعدت اجمع من ٣ كبتات واتوقع احتجت ٣ ايام !!

وفي طريقة ثانية اعجبتني في كتابها تغيرت فيني كذلك..اللي هي ان نجمع الاغراض على (النوع - Category ) وبليز لاحد يقولي داه طبيعي! لا طريقتها ودقتها فالنوعية مش طبيعية وعمري مانتبهت لها! اللي هي ان نجمع اغراضنا من نفس النوع فمكااان واحد..نقطة! الملابس اللي نستخدمها كل يوم فمكان..المكياج  ومنتجات التجميل..الجواتي كللل نوع بروحه!
يعني مثلا انا قبل كنت احط الصابون الجديد فادراج الغرفة والصابون السائل فادراج الحمام..واشيا فالستورج..والمكياج نصه فادراج ونصه فشنط فادراج ثانية بعذر ان ماعندي مساحة...وحتى لو رتبتهم فالنهاية بيعتفسون بهالشكل..لين معاها التزمتتتت ان هالدرج راح يكون للمكياج ولو ماكفى الباقي راح ينقط لأن اكيد ماراح احتاجه او ماراح استخدمه!
وحتى منتجات التجميل جمعت كلللللل منتجات الوجه فدرج..والشعر فدرج والمنتجات الجديدة فدرج وهكذا..

وفي افكار ثانية للترتيب..للبيت كامل!
يعني بشكل عام تحسونها خبيييرة فالناس وطريقة عيشتهم وتخزينهم للاغراض وتعاملهم معاها!! فصج كانت تحكر لي كأنها عايشة معاي وفاتحة ادراجي تعلق وكل مااعطي عذر تقولي لا يلا غيري.. لول!

هل فعلا هالكتاب راح يغير حياتكم؟ بالنسبة لي نعمممم!وتدرون شلون حياتي تغيرت؟

- صرت اعرف كل غرض لي وين مكانه بالضبط!
- صرت استهلك منتجاتي اكثر لان صرت استوعب اللي احتاجه ومستحيل اشتري زيادة واحرص اني استهلك!
- بما اني نفضت كبتي قدرت اكون علاقة حلوة مع كل قطعة املكها وصرت لا اراديا اكشخ اكثر من اول لاني ادري ان كل قطعة فكبتي او راح تدخل كبتي راح تكون قطعة مميزة وانا واثقة في هالشي بدون نقاش،وصار عندي وعي بكل القطع والاكسسوارات اللي املكها فسهل جدا اني اطقم القطع! ومن قريت كتباها وبديت اطبق قسم ترتيب الملابس (شهر ٧،٢٠١٧) الكل لاحظ التغيير في ستايلي الحمدلله... ((ترى هالكلام سهل وكنت اقوله دايما..بس لم تتبعون كلامها ترى تنتقلون لمستوى أعلى وتكونون فاهمين بملابسكم أكثر فلا تستهينون بهالشي)).
- عقب الترتيب احس اني صرت انسانة خفيفة مافي اغراض تثقل يومي! فبالتالي اهتمامي الاكثر صار فروحي ونفسيتي وشخصيتي وعايشة فروقان 😻


ملاحظة: الكتاب مش عشان يكون البيت مرتب ومنظم كشكل وكلون نفس بيت اليخاندرا للي ترتب اكياس الشاي على حسب الوانها لول .. ودي بس مستحيل بالنسبة لي! بس عالاقل كل شي املكه استخدمه وكل شي املكه له مكانه الخاص وهالشي انجاز لي والحمدلله احس بشكل أو بإخر البيت يترتب تلقائيا!

لذلك انصحكم بقراءته متوفر فمكتباتنا بالانجليزي وبالعربي (سحر الترتيب)!

واللي قرا الكتاب هلا فعلا حسيتو انه غير شي فيكم؟ هل استمريتو بهالتغيير ولا رجعتو نفس قبل؟