سويت حفلة لسلطان حبيبي لانه كمل سنة ومشى+لان ابي اسوي شي سبشل له نصوره ونتذكره دايما!
اخترت ثيم الحفلة (توي ستوري) لانه من افلامي المفضلة وحسيت راح يناسب عمره..
الصراحة هالحفلة كانت بالنسبة لي شي جديد..ماقد سويت حفلة بهالمستوى..ففي البداية كنت وايد وايد ضايعة مب عارفة شلون انظم التفاصيل عدل..ومب عارفة شختار وشسوي
لين بديت اشتغل على بورد في Pintrest جمعت فيه افكار للحفلة..وشوي شوي بدت الصورة تتضح فمخي وبديت ادور اغراض للحفلة شهرين قبل..واول شي خذته لعبة وودي! لان ابي سلطان يتعود عاللعبة وعالاقل يحس انه شي مألوف مش شي مفروض عليه فيوم الحفلة! وبعد خذت له الجنود والكائنات الفضائية والصراحة استخف عليهم صرنا نشيلهم معانا كل مكان ^ـ^
 |
| توزيعات اليهال |
 |
| صورة أوضح |
التصاميم:
شريت الخلفيه من موقع Etsy وهم اكتبو لي الاسم
وبعد تصاميم الحلويات والشغلات اللي في الحفلة شريتها في باكج واحد من نفس الموقع
الكيكة:
@amanie_medawar_fedawi
ماشالله شغل هالمحل عجيب..رويتهم صورة وسوولي شغل ادق من الصورة واحلى!
النطاطية/المسابقات/البوب كورن/شعر البنات:
قطر الخير
55251744
خذت من عندهم باكج الحفلة( مسابقات،بوب كورن،شعر البنات)
والحمدلله اني خذت كل شي من مكان واحد لان الصراحة فالحفلة ماكان عندي وقت ان اتفاهم مع الف مكان..كفاية يمكن فاليوم نفسه ولا ٦٠ اتصال!!!! فنصيحة للي يبي يسوي حفلة يهال يحجز من مكان واحد ويرتاح
بس في شي بط جبدي..اني قبل الحفلة بيوم أكدت عليهم كل شي وطلبت منهم يجيبون وصلة مع الستيريو مالهم..جووني البيت بدون ستيريو وقالو اني بلغتهم اني مابي ستيريو -ـ- صج حركة اقهرتني لان ماكان عندي فالبيت..فتأخرت المسابقات فوق الساعه لين دبرت لي..يعني اليهال اقعدو ساعه بس جي ماعندهم شي يسوونه!!
يعني انصحكم فيهم بس أكدو عليهم الف مرة على كل شي قبل بيوم وفنفس اليوم!
البالونات الهيليوم
30151489
كلمت هالريال وجاني البيت نفخ النفافيخ اللي عندي وجاب لي هو من عنده عالالوان اللي بغيتهم
ماشالله جاني عالوقت بالضبط..وبما انه جاني الساعه ١ والحفلة تبدأ الساعه ٤..قالي بنفخهم لج شوي زيادة عشان يظلون..وصج صج ماقصر والنفافيخ تمت للساعه ٩ بعد..لان مثل ماانتو عارفين حدهم ٦ ساعات
اذا النفافيخ من عنده:٨ ريال للحبة
اذا من عندكم: ٦ ريال
مايجي الا ل٥٠ نفاخة كحد ادنى
ـــــــــــــــ
* فالحفلة كنت وايد مشغولة فمالحقت اصور صور عدلة..فأغلب الصور صديقتي ماقصرت صورت لي!! فانصحكم دايما توكلون مهمة التصوير لحد ثاني متفرغ!!
*على فكرة راح يكون في بوست ثاني فيه صور توي ستوري اشتغلت عليها بعد الحفلة بكم يوم..لان حسيت ان صج فخاطري اصور شي عدل لان وايد وايد تعبت وانا ارتب واشتري واجمع اغراض الحفلة! فاحس المفروض هالشي يتوثق هههه +اعششقققق توي ستورريييي وايد وايد
*وأخيرا..انا جدا سعيدة وفخورة بالشغل اللي سويته وانتجته حق ولدي..كانت امنية لي ان اذا صار عندي ياهل انا ارتب له كل شي لحفلاته او اي مناسبة! ابي كل شي يكون بيدي دام عندي وقت ومتفرغة..والحمدلله قدرت احقق هالاشيا فحفلته
بالنسبة لجودة الصور...ترى البلوق مادري شفيه يخرب الجودة فسوري..
وشكرا ^ـ^
