منتجاتي المفضلة لسنة ٢٠١٣

 السلام عليكم

خلال هذي السنة كان اهتمامي كبير بالمنتجات التجميلية، وتقريبا قدرت اكون لي مجموعة متكاملة من المنتجات المعروفة أو الجديدة، وبكل صراحة انا شخصيا مش من النوع اللي يجرب كل كل شي فالسوق،ولا اني كل شهر اخذ لي منتجات..يعني تسوقي لهذي الاشيا يكون بطريقة عقلانية أكثر.. ومن خلال تجاربي حبيت اشاركم بأفضل منتجات جربتها الفترة اللي طافت، وماراح اتكلم عنها الا و إني جربتها لاكثر من شهر وفعلا عجبتني وصرت مااستغنى عنها وآفضلها .دايما

للتنويه: ممكن يكون عندج منتج انتي راضيه عنه ومش محتاجة نسخة ثانية من ماركة ثانية لذلك اتمنى ان يتم وضع هذا الشي في عين الاعتبار قبل ماتفكرين تجربين احد هذي المنتجات. واذا عندكم استفساارات تفصيلية عن اي منتج وحابين تعرفون تجربتي بالتفصيل عطوني خبر :)

منتجات الشعر:

ذكرت سابقا اني قصيت شعري، وطبعا قص الشعر لايعني الراحة! بالعكس..اكتشفت انه محتاج عناية مكثفة عشان يكون  مرتب ومايصير نفس شعر ماروكو

L'OREAL Total Reapir: استخدم هالكريم اثناء غسل الشعر ولكن مرة في الاسبوع وراح تلاحظون نعومة الشعر وانتو تحطون الكريم وفعلا بعد ماينشف راح يكون الشعر اهدا وارتب.

L'OREAL Smooth intense styling cream: ولاني استشور شعري بالاستشوار باناسونيك المشط فدايما احتاج منتج عشان يساعد شعري انه يطلع بشكل ارتب ومشابه لاستشوار الصالونات،ومن اول مرة استخدمت هالمنتج عجبني  وايد وفعلا الشعر طلع يجنن ومرتب ومب مشوط من الحرارة ههههه D:

        منتجات العناية بالبشرة:

POND'S Smooth Pores Facial Foam  اول مرة استخدمت هالغسول عند اختي، تقريبا كان عندها ٥ صابونات للويه وكل يوم كنت اجرب شي هيهيهي..لين استخدمت بوندز، واول مرة احس ان صج ويهي صار نظيف على طول بعد الاستخدام والحبوب السوده  اختفت على طول وحسيت المسامات المفتوحة قل اثرها بعد كل استخدام..حتى هي شافت هالتغيير على ويهي وقررت تشتريه لي..هيهيهي يمكن عشان ماخلص مالها :P

Eucerin AQUAporin Active Moisturising creme  الحلو فهالكريم انه يرطب بدون مايعطي شكل دهني عالويه واختياري له كان فالبداية عشوائي وعقب ارتحت عليه وماجربت شي غيره.

 Glyton Treatment Acne Gel قبل سنتين كنت اعاني من بشرة متوحشة جدا جدا..كانت الحبوب نشطة طول الشهر(حبوب بيضة وحمرة وسودة) ومنتشرة على الخد الايمن فقط،وماتتخيلون كيف ان هالشي يأثر على نفسية الوحدة :( وطبعا جربت منتجات للبشرة والحبوب بشكل ماتتخيلونه لكن ماتغير اي شي في بشرتي اطلاقا! لين مره شفت موقع اسمه Acne.org وينصح باستخدام اي جل او كريم فيه بينزول بيروكسايد، وقررت اجربه بعد ماشفت الريفيوز وخذت لي جل بينزول بروكسايد من امازون بشكل عشوائي بدون مااقرا ريفيوز عن المنتج نفسه،وانصدمت صراحة ان خلال اسبوع الحبوب بدت تهدا وتنشف وخلال شهر اختفت بنسبة كبيرة..لكن للامانه ظلت بعض الاثار والمسامات المفتوحة. وحاليا تجيني حبوب لكن لفترة معينة واقدر اسيطر عليها اذا استخدمت الجل. 

وللتنويه ان اي منتج فيه مادة البروكسايد مايصير تستخدمونه بعد تقشير البشره او بعد استخدام صابون فيه مواد مقشره لانه ممكن يحرق الوجه (يس سويتها هههههههه)

ST.TROPEZ Tanning mousse استخدمت هالتان فالصيف وفعلا لاحظت تغيير حلو وطبيعي في بشرتي ويضل تقريبا من اسبوع ل١٠ أيام..بس مشكلته الوحيدة ان ريحته فالبداية تكون واضحة فأول ٣ أيام ..
Pivoine Flora Hand Cream-L'OCCITANE كريم لوكتين لليد روعه! اولا تحسين انه مثل الزبدة يذوب عاليد وبسرعه تمتصه البشره وماتحسين انه دهني او يترك أثر مزعج ..بالعكس عادي كأنها يد طبيعيه بدون طبقات :P وفوق هذا كله ريحته حلوووة! واحس اول مايخلص على طول باخذ لي غيره لان اكثر كريم ارتحت له!
FREEMAN Body Sugar Scrub Pomegranate حبييت السكراب للجسم ويترك ريحة رمان حلوه..
Peppermint Intensive Foor Rescue The Body Shopاحم..انا فيني طبع اني امشي وانا ادرس..فتخيلو اسبوعين استعداد للامتحانات وارهاق وتوتر وشغل ماينتهي لمشروع التخرج كنت في حالة جدا جدا صعبة واحس ريلي كانت في حاله يرثى وخصوصا بعد ماخلصت من المشروع وبعد الوقفة طول اليوم بالكعب رجعت البيت واحس ان في مسامير فريلي مب قادره اوقف :"(  وكنت حاسة اني محتاجة شي ينعنش ريلي يرد روحها ! وصدفة اني في فيلاجيو واتذكرت ان بودي شوب عندهم منتجات للريل بالمنثول..وحزتها على طول رحت خذت لي الكريم ودهنت ريلي المسكينه قبل مانام وهي تعورني حدهااا! احس اول ماحطيته واايد ارتحت وفعلا حسيت الكريم نعنش ريلي وقمت ثاني يوم الحمدلله كأن مافيها شي..فصج صج حبيت هالكريم وحسيت ان الفايدة كانت فالمنثول أكثر من انه كريم بس!
Wake Me Shower Gel Bourjois لفت نظري شكل الشور جل وشميته فالجمعية، وكانت ريحته قوية وحلوة..صج انها ريحة للصيف بس حبيييتها ومب ناوية انطر لموسم هالروايح لوول.. مع اني كنت محتارة كان فخاطري اخذ كل الروايح بس تعوذت من ابليس وقلت اجرب ذي اول شي واذا عجبني اسطو عالباقي ^ــ^ .. جربته فالبيت وصج ينعنش وريحته فواكه وورد وفوق هاي كله احس هالشي الوحيد اللي يشرح الصدر فالشاور بأالوانه الحلوه هعهعهع

المكياج

LORAC Pro Palette خذت هالباليت شهر ٢ لان كنت محتاجة علبه فيها اغلب الالوان الاساسية وبصراحة روعه روعه روعه شوي عليه! يعني في كل الالوان اللي ممكن احتاجها ومن بعده كلش ماحتجت اشتري اي شدو نهائيا! فيه الوان مات للجامعة والوان فيها جلتر للمناسبات.. جودة الالوان ممتازة وتظل طول الوقت وخصوصا لو استخدمت البرايمر اللي يجي مع العلبه

 Laura Mercier tinted moisturizer احب استخدم التنتد موسترايزر للجامعه، وهالسنه كنت استخدم لورا ميرسيه موسترايزر لان فيه واقي للشمس وتغطيته حلوه وخفيفة وبشرتي وايد مرتاحة له ^ــ^ 

Chanel Vitalumiere Aqua Foundation خذت هالفونديشن من أكثر من سنه وعجبني لونه علي وتغطيته وايد حلوه تحسون انه يندمج عدل عالويه ويعطي شكل طبيعي ونظيف،، والعجيب ان واايد واايد استخدمته وللحين ماخلص يحليله احس بيعيش طول العمر هعهع.. وايضا هو مكون أكثر من الماي وقوامه خفيف ،عشان جي هو وايد مفيد للي يعانون من مشاكل فبشرتهم لانه مايظل فالمسامات مثل الفونديشن اللي يكون مكونه الاساسي الزيت,وأيضا زين للبشرة الدهنية..فكنت احبه لاني اعاني من هالشي في التي زون :\ 

Bourjois Healthy Mix Concealer  كنت استخدم كونسيلر ماك الكريمي، كان يغطي بشكل عادي لكن مش بيرفكت! فكنت دايما احاول ازيد او استخدم الفرشاة وبعد مافي فايدة احس مب حلو على بشرتي ومايغطي تحت العين..المهم مارتحت له وايد وقررت اجرب اي كونسيلر من اي ماركه وحزتها كنت صوب بورجوا وخذت هالكونسيلر وانا ماعندي فكرة عنه..ولم جربته صج حسيت اني كنت وايد ظالمه ويهي مع كونسيلر ماك :O ..يعني صج الحمدلله ذي تغطيته حلوه يخفي السواد و الحبوب بشكل عجييب… 

Les Beiges Healthy Glow Sheer Powder CHANEL  حبيت البودرة كتغطية جدا خفيفة فوق الفونديشن او حتى كبرونزر لأني خذت درجة غامجة.. 

DIORSHOW Mascara اول ماجربت هالمسكرا ماحبيتها وحسيتها تعفس الرموش *ـ* وعقب جربت مرة اني امسح المسكره بفاين قبل ماستخدمها وحزتها صج شفت الفرق! تطلع الرموش حلوه وغليظة ومرتبه وتكبر العيون لانها ترفع الرموش.

Kanebo Sensai Lip Stick هالروج جربته فالمحل وخذته لان لونه حلو بس..لكن مع التجربه اكتشفت ان تغطيته قوية وحلوة وايضا هالروج احس يرطب الشفايف ويعطيها منظر حيوي..واحسه وسط..مش دهني كأنه بيسيح ولا مات ناشف..بكل بساطة بيرفكت كلون وتغطيه وخفيف عالشفايف مش مزعج وثقيل.

Lancome Traceur Matic Eyeliner احلى شي فالاي لاينر انه اسسسود ولونه ثابت جدا وقوي.. وحتى فرشاته سهلة للي مثلي يعانون من صعوبات فوضع الاي لاينر هي هي هي 

  Maybiline BabyLips بالنسبة لي احسسسن مرطب للشفايف واحسه ادمان صراحة! الازرق فيه واقي للشمس والوردي ريحته حلوه وحتى لونه حلو للجامعه لانه خفيف..ومرطب قول وفعل صراحة مش خرابيط :P واحب احطهم فشنط يدي او شنطة المكياج

Korres Lip Butter: دايما استخدمه الصبح عشان يرطب شفايفي ولان غالبا اكون داعسة البيبي لبس فشنطي واتعايز ادورهم هعهعهع بس طبعا كلهم لهم نفس المعزة ;)

By Terry Lipstick and Sheer Rouge

جاتني هدية ارواج باي تيري! ومن أول تجربة وقعت في حب هالارواج لان تغطيتهم مختلفة وحلوه عن ارواج ماك! بصراحة احس احنا مرت علينا فترة مانشتري غير ماك!! وهالشي احس حرمنا ان نجرب ونشوف منتجات مختلفة بمكونات مختلفة!…المهم عقب ماجبت الارواج على طول رحت دورت مكان الماركة وحصلتها عندنا في باريس غاليري وخذت الروج البني وخذت بعد الشير روج ب٣ الوان.. بالنسبة للارواج العاديه تغطيتهم حلوة وصرت احب استخدمهم للمناسبات اما الارواج الشير صرت استخدمهم للجامعة او للبيت لانهم خفاف عالشفايف وتغطيتهم خفيفه ^ـ^ وصراحة ناوية اجرب منتجات اكثر من باي تيري لان حبيت منتجاتهم عالكاونتر ^ـ^

Lipsticks from left to right:
Cherry Cherry 304,Terrybly Nude 100,Hot Cranberry 302

Sheer Rouge from Left to right:
Baby Bloom 3, Nudissimo 1, Dragon Pink 5

مناكير

الواني المفضلة لهالسنة من:

By Terry: Terrybly,Moving Mauve
MAC: Past Curfew
Essie:For the twill of it,a list,Snake it up

Corrector Pen حبييت مزيل المناكير اللي على شكل القلم واستخدمه عشان ارتب اطراف الاظافر بعد ماحط المناكير ،والحلو ان يكون معاه قطعه اضافيه لتبديل الاسفنجة اذا توصخت.

تخرجت ولله الحمد…

تخرجت!

وأخيرا!

دايما يسألوني..شنو شعورج؟شبتسوين؟متى بتشتغلين؟شلون اجازتج؟شسويتي؟

شعوري؟

احس مب مصدقة اني تخرجت!! يعني كنت اعد الايام عشان ايي اليوم اللي اكون فيه متخرجة والحمدلله تحقق هالحلم!

صج ان الجامعة متعبة وصعبة وخصوصا أيام الامتحانات بس بعد وبكل صراحة اعتبرها أحلى ايام حياتي وحلوها كان أكثر من مرها، فيها تعرفت على صديقات مستحيل أنساهم وكنت كل يوم أروح فيه الجامعه أرجع متعلمة شي جديد سواء  أكاديميا..أو حتى لو كنت راقدة ومسطلة فالكلاسات!! لازم ارجع ومتعلمة خبر بشكل من الاشكال..سواء اخبار الدنيا أو الموضة أو الهبات الجديدة.

صج شوي قلبي يعورني أن هالخبرة اليومية راح توقف هالفترة…لكن الحمدلله المكان اللي وصلت له مب شي يسهل واتوقع الحين مستعدة لرحلة جديدة فالحياة ومجتمع جديد ومسؤولية مختلفة!

الجامعة غيرتني وطورتني..خلتني أفهم شخصيتي أكثر وأفهم اختلاف الناس اللي حوالي

ف الحمدلله الحمدلله اني قدرت اجتاز هالمرحلة ^ـ^

وعقبال اللي ينتظر هاللحظة :) 

النوف ستايل في انستاغرام

السلام عليكم

انشغلت في الشهرين اللي طافو بشكل مب طبيعي..صج ان بداية هذا الكورس كنت اكتب لكم لكن الحين وصلت لمرحلة ان صعب جدا اشتغل عالبوستات..واحس هذا تقصير مني فقلت الحل الوحيد اني اشاركم ببعض الاشيا على انستاغرام لين اخلص هالكورس.. 

المميز في انستاغرام اني راح اشاركم بتجاربي،الاشيا الجديدة اللي اكتشفتها،المطاعم والسوق ويومياتي بشكل عام

وناوية ان شالله بعد ماخلص واتخرج اني انتقل بالبلوج لمستوى أعلى وراح تلقوني في أكثر من شبكة اجتماعية

وحاليا تواصلو معاي اذا حبيتو احط لكم اشيا محددة او اي شي فخاطركم

instagram:

Alnoufstyle

بباي ^_^ 

صالون غلو اميركان

من فترة قررت امر على صالون "غلو اميركان" اللي في الخليج الغربي عشان اقص شعري..بس قبل ماقولكم تجربتي فالصالون خل اقولكم شلون تجرأت اروح الصالون بدون مااسمع عنه اي شي وخصوصا اني رايحة اقص شعري أو بالاحرى احشه حش هعهههع

المهم من شهور اكتشفت ان في صالون اسمه غلو اميركان وسأالت صديقي قوقل وانصدمت لم شفت عندهم موقع عالانترنت لان هالشي مب من عادات صالوناتنا فالدوحة، ولم دخلت الموقع انصدمت بالنظام اللي فيه وترتيبه وتوفيره للمعلومات الكافية لأي شخص وده يجرب الصالون، يعني حاطين المينيو بالاسعار وأنواع خدماتهم وفوق هذا كله اسامي اللي يشتغلون فالصالون وخبرتهم..

فسجلت ايميلي عندهم بس جي عشان مانسى الموقع ولو اني ماتوقعت يطرشون شي اصلا!

بس انصدمت عقب التسجيل انهم مطرشين كوبون ب٢٠٠ ريال عشان يشكروني فالتسجيل وعشان اجرب اي شي عندهم..

امانه ترى لاتضحكون لان والله والله انا شخصيا فاقدة الامل ان احصل مواقع قطرية تتواصل مع عملائها..فصج انصدمت من تواصلهم الدايم معاي سواء بالعروض أو الخدمات الجديدة، ولدرجة ان اذا وحدة من اللي يشتغلون راحت خذت لها دورة في باريس عن الشعر يطرشون لكم ريفيو وشسوت وجي... يعني ادري ان كل هالاشيا فمصلحتهم بس انا تقريبا زهقت من صالوناتنا اللي كلش ماتحاول تطور من خدماتها ولا من طريقة التواصل مع العملاء..فغلو صالون اسحروني من هالناحية بس انا راضيه خخخخخ 

المهم خلونا نرجع لموضوع حش الشعر

قررت اسوي نيولوك واقص شعري،وللعلم كان طويل يعني تخيلو الجرأة اللي كنت محتاجتها عشان اقصه وايد قصير..

وخصوصا ان هذي ٣ مره اقرر اقصه،قبل كنت اروح صالونات ثانية واقول للحرمة قصيه ..تتخرع وتقول حرام ومايصير خليني ادرجه لج بس وتخرعني واقولها درجيه وبس :(.

لكن فعيد الاضحى عزمت وقلت بقصه يعني بقصه واللي يصير يصير.. وقررت اروح غلو اللي فلاجونا لانهم ساحريني مثل ماقلت لكم هههه ولانهم قريبين من بيتي بعد 

المهم طبعا نظامهم بالحجز فحجزت قص شعر وحجزت بدكير منكير، وترى حجزت قبل الموعد باسبوع لان جدولهم مزدحم :$

اول مادخلت الصالون عجبني المكان والديكور وقعدت في مكان الانتظار لين ينادون اسمي، وقعدت اشوف منتجاتهم...وطبعا قلبي طاح لم شفت ان عندهم مناكير ايسيه لان شخصيا صرت استخدم ايسيه اكثر شي،وعندهم منتجات ثانية وحلوة واغلبها امريكية صعب تطلبونها من النت و ماتحصلونها في اي مكان مثل المناكير ولوشن سانت تروبيه للتان!

المهم جا دوري لقص شعري ومتخرعه حدي وتوقعت اللي بتقص لي بتخرعني زيادة،لكن والله عجبتني! كانت جدا واثقه فنفسها وقعدت تشوف شعري وقعدت تشرح لي شبتسوي وشنو المناسب لي وشلون بيكون شكله، المهم قصت لي وأخيرا! وفعلا شكلي تغير وقدرت انجز الهدف اللي كنت مخططة له! 

طبعا القص يشمل غسيل الشعر والاستشوار.

وحبيت اقولكم ان لم تحجزون ممكن تحجزون عند وحدة سينير او جونيور مع فرق فالسعر طبعا

وبعد ماخلصت قص رحت سويت بدكير ومنكير واخترت نوع (الكابتشينو) وهاي كان نوع واحد من انواع غريبة وعجيبة على حسب الريحة او المزاج وجي..ويقدمون لكم مشروب وانتو تسون شغلكم ^ـ^

شغل البدكير والمنكير كان زين بس شوي تضايقت ان وحدة بس سوت لي فوايد طولت،يعني لو مرة ثانية بروح لهم لازم اقولهم ابي ثنتين!

ومن الاشيا اللي عجبتني في الصالون احترامهم للزبونه، يعني من تاخذين الموعد يوضحون لج نظامهم وان مثلا مايصير تجيبين يهال الا اذا حجزتي لهم شغل،و الهدف ان يوفرون بيئة هادية ومريحة لباقي الزباين، وبعد وايد يحترمون الوقت واللي مثلا تحجز وماتروح ولا تتصل وتخرب على غيرها يكون لها ريكورد بهالشي...

انا مادري في ناس يمكن يشوفون ان قوانين صارمة بس انا شخصيا احب النظام واحب الناس تحترم وقتي لاني ادرس واحيانا اخذ مواعيدي ويكون عندي شغل للجامعه فمابي يأخروني لان وحده كنسلت او وحده تأخرت..يعني الخلاصة احب احترم وقت غيري وبعد ابي غيري يحترم وقتي!

Glow American Salon

10:00-7:00

11:00-8:00 Fridays

Monday Closed

Links

Salon Etiquette 

Services

Contact

Beach Tower - West Bay

4411-7652

Lagoon Street - West Bay

6686-7221

Salwa  
44689945

ميموز فاكتوري

من فترة مريت على مول دار السلام واكتشفت محل يجنن فيه صواني أكل للبيع وفيه أدوات مطبخ..
المهم وانا اتمشى فالمحل قلبي يتمزق مع كل خطوة :"(
احس اللي سوى/ت المحل فاهم اللي فخاطري عدل عدل عدل..ومن خبرتي فمحلات أغراض المطبخ فالدوحة،اعتبر ميموز فاكتوري من أفضلها!
المتوفر فالمحل صواني حلويات وموالح وسندويجات،ويسون كوكيز وكيك عالطلب

وأيضا يوفرون أجهزة طبخ KitchenAid..واستانست لم شفت عندهم خلاط الكيك الوردي *ـ* مب قلت لكم فاهمين اللي فقلبي؟ لأن صار لي أكثر من سنة انطر تيبل ارتس اللي في لاجونا انهم يجيبونها!

المهم الحين براويكم الصور..وان شالله يعجبكم مثل ماعجبني وطبعا الصور توضح شي بسيط من اللي عندهم *ـ*

هالباودر يستخدمونه لصنع الرويال ايسنج للكوكيز..وماينباع عندنا فالجمعيات،لكن بتحصلونه عندهم

أدوات الطبخ لليهال

Information:
Memo's Factory-Dar Alsalam Mall
Tel:44417717
Mobile: 33059000
Flickr
Instagram: memos_factory

تقييم مطاعم قطر في انستاغرام

من فترة اكتشفت انستاغرام لبنتين يروحون مطاعم منوعه سواء في الدوحة أو برع ويقيمونها، وماتتخيلون شقد استانست ان عندنا حد يفكر ان يخدم مجتمعه ويضيف له شي ويفيد اللي حواليه! 

واليوم بعد اكتشفت انستاغرام ثاني يسوي ريفيو عن المطاعم بتقييم واضح من عدة نواحي مهمة وتساعدنا فالحكم على المطاعم! 

فحبيت اعرض عليكم هالحسابين عشان اتابعونهم وتدعمونهم لأن صدقوني هذي مش مهمة سهله، ان يتم توثيق كل رحله الى كل مطعم وكتابة تقرير وراي بالمطعم بس عشان يفيدونكم ويساعدونكم فالاختيار او يساعدونكم ان تتجنبون بعض المطاعم.

foodrangers

في هالاكاونت بتحصلون صور حلوة وتقرير قصير وبسيط يوضوحون لكم الاكل الحلو في المطعم واحيانا ممكن يعطونكم معلومات عن الاشيا اللي ماعجبتهم والسبب..او يكلمونكم عن الاشيا اللي تحطونها في عين الاعتبار عند الطلب!.. واللي عجبني بعد ان يستخدمون تصوير الفيديو.. يعني نعيش الحدث! والريفيو باللغتين العربية والانجليزيه!

وبالنسبة للتقييم: يكون عن طريق "تقرير" + تقييم من ٥ + السعر 

hmd_belly

وأيضا هذا الحساب يساعدكم في اختيار المطاعم بتفاصيل حلوة ومسلية وتقييم دقيق للمطعم، والحلو بعد ان في تفاعل واضح مع المتابعين..

وطريقة التقييم اعتبرها عادلة جدا وممكن تأثر في الاختيار بشكل كبير: الطعم+التقديم+الخدمة+الجو العام+السعر (*/١٠) 

*  *  *

وفي النهاية اشجعهم بكل جوارحي، واشجع كل الي يحرصون ان يكرسون وقتهم لخدمة الغير في النت سواء بتقارير مطاعم،صالونات،فنادق،دورات منوعه والخ..

الله يعطيهم العافيه..واللي عنده اكاونت خاص لخدمة الغير او يعرف اكاونت من هالنوع ،ياريت يرسله لي عشان اشوفه ^ـ^

الاستعداد للجامعة !..

السلام عليكم

يوم الاحد بدا الدوام في جامعة قطر فهالمناسبة السعيدة او الحزينه للبعض قررت اكتب لكم شي عن الجامعة...بما اني استفدت فحياتي الجاميعة حبيت افيدكم ^ـ^ 

اولا حبيت اقول ان تنظيم الحياة الدراسية شي مهم جدا جدا عشان الواحد يمشي فدراسته وفنفس الوقت يستمتع..فبليز اللي للحين يعتبر الجامعه نكد يحاول يغير هالنظره اللي عنده.. صح واكيد ١٠٠٪ الامتحانات تحرمنا من الوناسه واللعب، وضغط الواجبات يوترنا..بس فالنهاية اللي احنا قاعدين نسويه أولا لنا وثانيا لاسم بلادنا..عشان محد يقول عنا  جيوبنا مليانه وعقولنا فاضيه..اوكيه؟ هههههه

المهم انا مش آنجل يعني ولا اني حاكة الكتب ومعدلي ٤ او شي، انا مجرد طالبه عادية تحاول تبذل أقصى جهدها ان تمشي فالجامعه..واحاول قد ماقدر اربط الاشيا اللي احبها بالدراسه عشان ماتملل..مثل التكنولوجيا، الافلام، اكافأ نفسي باشيا والخ.

فانا شخصيا استعد للجامعه اولا اني اجهز نفسيتي للموضوع لان هاي اهم شي..
يعني لازم الوحدة تفهم نفسها وشنو اللي يريحها وتشتغل عليه والشي اللي يوترها تبتعد عنه!

الحين بقولكم عن التقنيات اللي استخدمها للجامعه وفادتني وان شالله تفيدكم ^ـ^

1- Notability

هالبرنامج تقريبا اغلب ربعي يستخدمونه عالايباد، واايد مفيد ان ننقل فيه المحاضرات من البور بوينت...ويصير بعد تكتبون فيه،بس اتوقع لو بالقلم بيكون اسهل *ـ*

تقدرون تقسمون موادكم في فولدرات، وفي كل فولدر تحطون السلايدات

 ومثلا اذا عندكم نوتس  بكل سهولة تقدرون تطرشونهم لربعكم عن طريق الايميل او دروب بوكس او تطبعونهم!

..حبييييت والله

يعني مثلا لو رفيجتج غايبة تقدرين بعد الكلاس على طول تطرشين لها..

وهذا شكل النوت من داخل

تقدرون تكتبون بالكيبورد+باليد+هايلايت ماركر+مساحة+مقص 

ممكن تنقلون اي شي كتبتوه لمكان ثاني..

تعرفون في دكاترة يطلبون منكم تطبعون السلايدات قبل المحاضرة..عشان تقرون او تخططون والخ..يعني احس ماله داعي كل يوم سالفه ونزلي الملف واطبعيه وحطي الاوراق في شنطتج ويمكن تجيبينها ويمكن تنسينها والله يعلم! فلو تنقلين السلايدات على طول من البور بوينت قبل او وقت المحاضره بتقدين تشتغلين بسهولة وتخططين بالوان واشكال وبصراحة شي يونس *ـ*
وانا يعجبني وايد لم اخطط عليه وانا ادرس للامتحان،سهل وحلو 

وبدال ماطبع ٦٠ ورقة للامتحان..اقدر ادرس من الايباد وبكل سهولة بدون تضييع وقت في الطباعه وخساره حبر وورق D: 

طريقة نقل الملفات:

- اول ماتفتحون البور بوينت بيطلع عاليمين Open in Notability

اضغطو عليه وبينفتح الملف في نوتابلتي بكل بساطة!

سعره:٢.٩٩ دولار

بس الخدمة اللي يوفرها لنا كطلبه يستاهل اكثر والله *ــ* فلاتضيعون الفرصه ;)

٢- DropBox

دروب بوكس وااايد مفيد لنقل الملفات الكبيرة..لكن من فترة استخدمته لقروب وورك بروجكت وماتتخيلون شقد يسهل ويبسط الشغل..واااو يعني بشكل ماينوصف!

بكل بساطة تسون ملف وتضيفون كل اللي معاكم فالبروجكت ووتسون لهم شير ويقدرون يدخلون يجيكون عالملفات اي وقت وبسهوله

غير عن ايميل الجامعه لم تطرشين حق وحدة ايميل ممكن ماتفتحه الا عقب اسبوع فيضيع بين باقي الايميلات وصعب ترجع له وفلانه وصل لها وفلانه لا!! هاي احس وايد اريح وناوية اعلم بنات مشروع التخرج عليه وان شالله نشتغل عليه لان متأكده انه راح يساعد واايد فشغلنا وخصوصا بنحتاج ننقل ملفات كبيره! ويعني افضل نخزن ملفاتنا اون لاين عشان لاسمح الله صار شي فاللاب :"((

الابلكيشن موجود فالابل ستور بعد لو حبيتو تشوفون الملفات عاليباد او الايفون!

3- تقويم الفصل

فكرة التقويم تعلمتها من دكتورة امريكيه فثاني كورس لي فالجامعه، ومن بعدها انا بداية كل كورس اسوي هالتقويم..

الاسباب؟

١- يساعد مخي ان يكّون صوره شلون الكورس بيكون!  

٢- احدد الامتحانات باللون الاحمر عشان مانصدم اذا قرب الموعد وانا مب مستعدة نفسيا

٣- احدد الكويزات والديد لاينز

٤- اطبع الجدول والزقه (او ممكن اخليه في اللاب عشان اعدل عليه مع الوقت واطبعه بشكل شهري)

الفايدة؟ لم اشوف التقويم اعرف بالضبط الاسابيع اللي بنكرف فيها او اللي بيكون فيها كويزات وامتحانات..فاجهز نفسي قبل بأي طريقة..وخصوصا احيانا مع الضغوطات تمر الايام بسرعه وننسى او ماننتبه للشغل اللي علينا..فمثلا عندج امتحان مادة صعبه عقب اسبوعين لكن قبل باسبوع عندج تسليم بحث وامتحان وكويز!! فهالشي لازم ينبهج ان الامتحان اللي بعد اسبوعين ماراح يكون عندج وقت تدرسين له  فلازم تبدأين..ويعني هذي الفكرة بشكل عام :)

فدايما اول اسبوع دوام ولاني اكون متفرغه ومافي واجبات..افتح السيلبس مال مقرراتي وانقل من الجدول اوقات الامتحانات والكويزات والديد لاينز (احيانا يحطون لنا الاسبوع مش التاريخ بالضبط،فاحطه بداية الاسبوع وبعدين أغير)

عقب ماعبيت الجدول اكتشفت ان شهر ١٠ بيكون مليان شغل،وخصوصا ان فيه عيد ونبي نستعد للعيد وفنفس الوقت شكلنا مابنقدر نتهنى فاجازه العيد هههههههه 

فيعني اتوقع اذا فخاطري استانس فالاجازه لازم استعد اول باول للامتحان عشان مايتراكم علي واتعذب بعدين ><"

واذا تبون الجدول تقدرون تخزنونه Download 

٤- ملف الجامعه في اللاب

من بداية الجامعه انا مسويه ملف خاص بكل فصل دراسي و فيه ملفات فرعية للمواد، وفكل مادة احط ملف للسلايدات او للصور او للابحاث عشان شغلي يكون مرتب..واحيانا في اشيا مهمة اخزنها اول باول..لان اللي جرب البلاكبورد يعرف انه احيانا يستنذل عالخفيف ويوهقنا وقت الامتحانات او الدكاترة يمسحون اشيا..والله اعلم

وأخيرا اكيد كل شخص له افكاره والطرق اللي تريحه في تنظيم شغله، وفي ناس يحسون هالاشيا معقده وتضيع وقتهم..فأحس ان كل واحد وذوقه وطبيعة عقله ^ـ^

اذا عندكم اقتراحات ضيفوها عشان اجربها ;)
واذا عندكم استفسار وحابين تكلموني عن اي شي في الجامعه تفضلو في الكومنت او عن طريق الايميل..يسرني ذلك :)

Share it in Twitter
اذا تحسون بيفيد ربعكم ^ـ^"

سيرك دو سوليل في الدوحة!

ابتداءا من الخميس راح يبدأ عرض سيرك دو سوليل ( دراليون)  وبيستمر لين تاريخ ٢٨

سيرك دو سوليل مشهورين عالميا ومتواجدين سنويا في دبي،لبنان لاس فيغاس
.فشي حلو ان جاين الدوحة ..وطبعا هذي مش اول مرة،بس اول مرة لي ان اشوفه فواايد مشتطة وقلت اقولكم عنه ^ـ^

وهذا الفيديو بريفيو للسيرك:

اسعار التذاكر:

تنظيم المقاعد بهالشكل:

التذاكر تباع اونلاين

المكان:اسباير ارينا(قبة اسباير)

للاستفسار: 974.4466.5741

كيف أقضي إجازتي؟

اجازتي الصيفية بدت من اسبوعين وباقيلي اسبوع قبل الدوام.... صج انها فترة قصيرة لكن حاولت قد ماقدر اني استغلها بكل دقايقها وثوانيها...يعني ممنوع اقول ملل وممنوع أأجل الاشيا، وحاولت قد ماقدر اخلص كل الاشيا اللي أجلتها وقت الدوام أو من سنين لول.. فحبيت اشاركم شسويت عشان اقضي وقتي ^ــ^ أولا كمذكرة لي للمستقبل ومادري عشان تقرون تتسلون او تستفيدون :P 

١- يوتيوب

تركت بيوتي فيديوز من شهر ١ تقريبا لاني كنت مشغولة،فقررت هالفترة ارجع واشوف الفيديوهات اللي فاتتني وفي نفس الوقت اكتشف قنوات جديدة فيها اذواق مختلفة عن اللي كنت اتابعها..وصج الفيدوهات خلتني استغل وقتي عدل..لان اقعد ساعتين اشوف واحس هالشي يشطني عشان اهتم اكثر فبشرتي واتعلم اشيا جديدة ودروس مكياج..والحمدلله كنت اسكر اللاب توب وعلى طول اطبق واحس بوناسة واختي احيانا تجي تطبق معاي ونقعد نسولف عن البرودكتس وتجاربنا وجي..

القنوات اللي اتابعها اذا حابين تشوفونها:

ChloeMorello

FleurDeForce

TanyaBurr

Leighannsays

Zoella

A fab life

٢- سيلف تان

هالفترة بعد طحت فالسيلف تان لان فخاطري اغير شوي من اللوك ^ـ^ فصايرة كل يوم ادهن هعهعهع 

واستخدم حاليا لوشن جيرلاين سيلف تان وللويه واستخدم برونزر للويه ونيفيا للترطيب.. وناوية اجرب سنت تروبي St. Tropez لان وايد يمدحونه كأفضل سيلف تان.. واذا عندكم اقتراحات اكتبولي لاني ناويه اهبب فهالمووضوع خخخخ 

٣- احاول اتطور فالمكياج

صرت اتمكيج تقريبا كل يوم واقعد اجرب كذا لوك واحاول افهم المنتجات اللي عندي اكثر، لأن احس ان عندي اشيا حلوه ومنوعه بس لحد الحين ماعرفت استغلها بالشكل الصحيح..فالحين عندي فرصه اني اجرب واشوف شنو الاحلى علي وطبعا بمساعده يوتيوب قدرت اشتغل عالموضوع^ـ^

٤- تركيب

من زمااااااااااااان وانا ادور تركيب..بس جي دش فخاطري وابي اركب واتسلى واضيع وقت..والله درت دوارة فالدوحة وماحصلت..بس من اسبوعين كنت فدبي وحصلت تركيب في فرجن..واللي عجبني اكثر انه تركيب نيويورك..4D،يعني اقدر احط المباني بعد فوق التركيب .. انا كنت ادور على شي بيسك مب مطور جي..بس شسوي قلت شي احسن من ولا شي..وشكله يبيله شغل ومساحة فالبيت $ـ$ .

٥- اطبع صوري الشخصية

انا اطبع الصور الشخصية اللي اصورهم فالسفر لأن ماحب انزلهم فالكمبيوتر كلش.. احس شي يخوف، المهم تخيلو كسلانه من اكثر من سنه واحس مايكون لي خلق اطبعهم..فقلت هالمرة Now or Never وصج اشتطيت وقعدت اطبعهم..فقعدت افرز الصور واحذف الصور اللي مابيها ونقلت صور سفراتي كلها فمومري واحد وطبعتهم فطابعه سوني...الطابعه اهلكت مسكينه..احتجت يومين عشان اطبعهم XD 

بس الحمدلله خلصت والحين قاعدة ارتبهم فالبوم الصور ^ـ^

وانصحكم جد تطبعون صوركم الشخصية اللي لكم او لهلكم او لعيالكم لان لو تنتبهون ان من يوم بدينا نصور بالجوال صارت الصور تظل فالجوال طول الوقت ولا نرجع لها..ونبدل الجوال وتروح وننساها ومانقدرها وايد لانها جديده!! بس لو ركزتو فيها ان خلال هال٥ سنين يمكن ماعندكم ذكريات مطبوعه ومضمونه !! وبصراحة انا لاحظت اني استمتع فالبوم الصور اكثر من لم ارجع اشوف فالجوال :)

٦- اطبخ

هاي شي اساسي فحياتي ماتركه حتى لو دوام، فقلت اجرب وصفات جديدة 

خبز تيكساس رودهاوس

 بلاليط للريوق

 براوني روزبيري تشيزكيك

٧- منوعات

طبعا الواحد مايلتزم بجدول..وفي اشيا منوعه اسويها واتوقع الكل يسويها..واغلبها قعدات بنوتيه فالغرفة وأكل لووول

وأخيرا اتمنى هالبوست يكون مصدر الهام لكم ان تستغلون اللي بقى من اجازتكم فشي كنتو مأجلينه او هواية حابين تنمونها..ماتتخيلون الوقت اللي يروح واحنا مقضينه يامنسدحين وعيونا عالايفون في البرامج او اي اشيا ثانية تستهلكم وتستهلك ولا تساعدكم تنتجون اشيا ملموسة!