فطور رايق..صباح رايق

فطوري رايق يعني صباحي رايق

هذا هو شعاري فالحياة!

 الريوق عندي مهم جدا جدا وأحب اتفنن واتلذذ فيه واسويلي أجواء

واذا عبيت الثلاجة بحاجات حلوة للريوق، لازم فالليلة اللي قبل ارقد من وهل من الوناسه ههههههه

فحبييت اشاركم بالاكلات اللي احب آكلها هالفترة عالريوق ^ـ^

Breakfast on Bed | ريوق عالسرير

تسوونها؟؟انا عمري ماسويتها احس فالجامعه جد الواحد مخه متروس مايلحق يفكر فهالاشيا ففكرة اني اسوي ريوق عالسرير كانت فلسته الاشيا اللي بسويها لم اتخرج + لسته الاشيا اللي بتسعدني فحياتي.

وفعلا نفذت الفكرة لكن عقب شهوووور.. المهم مايبيله شي بتحتاجون صينية وتحطون فيها الاشيا اللي تحبونها وجبذا تكون اشيا حلوة ومالحة.. عشان يكون ريوق ريوق بوساعه مش شي خفيف :P

واهني كنت اطالع مسلسل Hart of Dixie وانا اتريق..

الريوق عبارة عن:فول ،بيض وطماط،كروسون،خبز اسمر وفواكه والمشروبات كرك وعصير برتقال

طريقة عمل الفول:

المقادير: (نص علبة فول بالخلطة المصرية+نص بصل مفروم+طماطة وحدة مفرومة +نص فلفل اخضر مفروم+ملعقة طعام بقدونس مفروم+ملعقة طعام صلصة+ملح+فلفل أسود+كمون+زيت زيتون)
الطريقة: 
١-حطي فجدر صغير زيت الزيتون والبصل وحركيهم لين يصير البصل بني شوي
٢- حطي الفلفل الاخضر والبقدونس والطماط
٣- حطي الفول واهرسيه بالشوكة
٤- حطي الصلصة والملح والبهارات واخلطيهم وعقب سكري النار وغطي الجدر لين وقت التقديم.
٥- نصب فوقه شويه زيت زيتون عند التقديم.

!!!كروسون بجبنة فيتا،فواكه،عصير برتقال وكابتشينو نسله وماتذكر ليش حطيت التلفون فالصينية..بس ماظن باكله 

زوووم

هالكروسون كان عذابي لفترة طويلة

طريقة عمل الكروسون بجبنة الفيتا:

١- كروسون سادة نحط فيه (شرايح جبنة فيتا+شرايح خيار وطماط ورشة اوريغانو)

٢- هههه حسيتو انه مجبوس صح؟

ريوق سريع | Quick Breakfast

كروسون بجبنة الحلوم:

١- نشوي الحلوم

٢- نحط فالسندويج جرجير والحلوم المشوي وطماط وخيار ونرشه بشوية اوريغانو

٣- استمتعو..لذيييذ

ريوق خفيف | Light Breakfast

أحيانا تكونون مرتكبين جرايم عظيمة قبل النوم وتقعدون ثاني يوم بطنكم بينفجر لكن لانكم ماشيين على شعار فطور رايق صباح رايق تغصبون نفسكم عالريوق خخخخ 

ممكن تاكلون شي خفيف وحلو ومايغث مثل الخبز ومنتجات الحليب

يعني سلطة ^ـ^

المقادير:

جرجير+خس+خيار+طماط+فجل+زيتون اخضر بحشوة جبنة الفيتا+عين الجمل(اختياري)

وللتبيلة: دبس رمان وزيت زيتون

وبالنسبة للعصير: فراولة وليمون فالخلاط

ريوق مطعم | Restaurant Breakfast

مرة قمت من النوم وفخاطري اوملت لاديوريه :| او اي اوملت جي اصفر ولذيذ نفس المطاعم

بحثت فالنت عن French Omelet 

والحمدلله حصلت طرق حلوة فقلت اجرب اي وصفة..

والصراحة عقب ماكلت الاوملت حسيت نفسي كنت عايشة في عصر الظلمات انا وبيضي المحروق خخخخخخ

والله كنت اتحسب البيض اما يكون ني او يكون بني!!

اللي سويته كان لذيذ بمعنى الكلمة لدرجة اني كنت اكله بدون خبز وهالشي غرييب جدا علي لان مستحيل اكل بيض بدون خبز احس بلوعه بدونه كأني آكل شي مفصخ او حافي مادري الصراحة المهم كان شي يقرفني خخ

فحسيت بانجاز عظيم لم غيرت هالفكرة!

الحين بقولكم الطريقة ولو كنتو تعرفونها وصج انا توني طالعه من عصر الظلمات فاعفو عني هههه

لان لم قلت حق ريلي عن هالاكتشاف قالي واخيرا استوعبتي ان البيض اللي مب محروق حلو لووول

المقادير:

٣ بيضات+ملعقة زبدة+ ملعقة صغيرة ملح+فلفل أسود+خضروات اختيارية..وانا اخترت طماط وبصل وفطر

الطريقة:

 ١- اخفقي البيض والملح بقوة لين يصير قوام البيض أقرب للماي،تقريبا في دقيقة...او لين تعضلين

٢- حطي الطابي على فرن تكون درجة حرارته متوسطة

٣- حطي الزبدة لين تذوب

٤- اول ماتذوب الزبدة حطي البيض وبالشوكة سوي حركات سريعه من برع لين نص البيض لمدة ١٥ ثانية بس

" انا شوي خربطت فهالحركة لان خليت البيض يستوي شوي وانا اقعد اصور ..فضروري تكون الحركة سريعه"

٥- لم تشوفين البيض تماسك وفالنص مازال شوي سائل اقلبيه

٦- وعقب حطي الخضرة فنص البيض

٦-اقلبي نص البيض كأنج تلحفين الخضرة $ـ$ ههه استعبط اقصد نص دائرة

٧- وبيكون الاوملت جاااهز للأكل بس رشي عليه فلفل أسود حسب الرغبة

اقلبيه اذا تقريبا صار جي

جوكلت لافا كيك

جوكلت لافا كيك

 

 

المقادير:

 

-بيضتين

- ثلث كوب سكر

-ربع كوب طحين

100 جرام زبدة غير مملحة

100 جرام دارك جوكلت أو سيمي سويت جوكلت

-فراولة واسكريم فانيلا للتزيين

 

 

الطريقة:

 

-ولعي الفرن على 180 درجة.

- في حمام ماي حطي لوح الجوكلت وخليه يذوب وعقب ضيفي عليه قطع الزبدة.

- في ملة حطي البيض والسكر واخفقيهم بالمضرب اليدوي

- وعقب ضيفي عليهم خليط الجوكلت وعقب حطي الطحين واخفقيهم

- وفي أكواب الجوكلت لافا كيك امسحي بالزبدة والطحين وصبي الخليط لين 3 ارباع الكوب

-بيكفي 3 أكواب كبار أو 6 صغار

-حطيه في الفرن لمدة 10 دقايق وعقب حطيه في صحن وزينيه بالفراولة والاسكريم او ممكن تضيفين مكسرات او نعناع او جوكلت سيرب!

 

طرق التقديم:

 

 

 

 

 

 

 

مكرونة اللحم المفروم

المقادير:

-مكرونة حجم صغير

-صحن لحم مفروم(استخدمت غنم)

-بصل

-ثوم

-نص كوب بقدونس مقطع

- نص كوب جلجلان مقطع

-٤ حبات طماط(اخلطيهم في الخلاط مع شوية ماي وملح)

-حبة جزر (مكعبات صغيرة)

- حبة فلفل رومي(مكعبات صغيرة)

- ملعقتين صنوبر

-قوطي صلصة

-جبنة موزاريلا

البهارات (ملح-فلفل اسود-كمون-كركم-بابريكا او فلفل بودر) وتقدرين تضيفين اللي تبين!

- فتات الخبز((اختياري))

للكريمة:

-٤قواطي قشطة

-ويبنج كريم حجم متوسط

-٦ حبات جبن كيري (او ٦ ملاعق جبن قلاص)

-ونحط المقادير في الخلاط ونحط شوية ملح ونخلط.

الطريقة:

اهم شي في هالاكلة هو اللحم المفروم ، لازم تتخلصين من ريحته لان مهما حطيتي من البهارات ريحة الزفرة ماتروح :|

بس عندي الحل الحمدلله

١- حطي اللحم في مشخلة وغسليه لين يروح الدم ويتصفى من المشخلة.

٢- حطي قدر صغير على نار متوسطة وحطي فيه اللحم المفروم

٣- راح تلاحظين ان في ماي ودهن يطلع من اللحم (هذي الزفرة بحد زاتها هعهع)

٤- بتحتاجين تشخلين اللحم عشان يروح الماي وترجعينه في القدر لين تحسين ان الماي مايطلع وايد واللحم نشف وحطيه على جنب.

((انتبهي ان اللحم ماينطبخ او يصير بني؛ الفكرة ان نشفه من الماي والدهن بس!))

في قدر متوسط ثاني ،سوي حمسة اللحم:

١- حطي زيت وعقب احمسي البصل والثوم لين يصير بني فاتح.

٢- حطي اللحم وحركي.

٣- حطي البقدونس والجلجلان واخلطي عدل لين تحسين ريحة البقدونس والجلجلان غطت على زفرة اللحم "نص دقيقة"

٤- حطي قطع الجزر والفلفل والصنوبر وحركييييييي.

٥- حطي الملح والبهارات..وبين كل نوع اخلطي شوي عشان مايصير اللحم يابس.(كوني كريمة في البهارات هع هع)

٦-حطي قوطي الصلصة واخلطي.

٧- حطي عصير الطماط واخلطي.

٨-غطي القدر وخليه على نار هادية لمدة ربع ساعه ((مع التحريك كل ٥ دقايق))

٩- في هالوقت اسلقي المكرونة.

١٠-جيبي صينية بايركس عميقة وحطي طبقة من المكرونة وحطي فوقها موزاريلا وخلطيها شوي.

١١-وزعي اللحم المفروم عالمكرونة

١٢-حطي طبقة اخيرة من المكرونة وحطي موزاريلا واخلطيه شوي.

١٣- صبي الكريمة اللي خلطتيها وحطي عليها موزاريلا وعقب انثري فتات الخبز ودخلي الصينية في الفرن عشان تتحمر من فوق بس.

وفيه العااافية

مكرونة اللوماكوني المحشية بالدجاج (القواقع)

تاريخي مع مكرونة القواقع:

تقريبا من 5 سنين كانت أول مرة أذوق مكرونة محشية ألا وهي مكرونة القواقع المعروفة بـ conchiglie..

وبعد فترة حاولت أبحث عن المكرونة وماحصلتها كلش..واستمر البحث لسنين متواصلة في الجمعيات وفي كارفور..ومافي فايدة :@

لين في رمضان هذا والحمدلله حصلت مكرونة شبيهة بمكرونة الـconchiglie وخذتها بلا تردد..اللي هي مكرونة اللوماكوني:

الحلو فيها انها سهلة جدا في الحشو..وماتطيح الحشوة منها وانا اشتغل عليها وفكرتها نفس فكرة القواقع :)

والحين بقولكم طريقتي في عمل هذه المكرونة الشهية..

مكرونة اللوماكوني المحشية بالدجاج

المقادير (لصينية بايركس متوسطة الحجم):

- مكرونة لوماكوني (بتحتاجين الكمية قد صينية البايركس واضافة 8 حبات)

- 3 أنصاف صدور دجاج بدون عظم وجلد

- بصل

- ثوم

- نص جزرة مبشورة

- كزبرة

- فطر مقطع قطع صغيرة
-فلفل رومي أحمر وأصفر مقطعين قطع صغار (وممكن تستخدمين الأخضر بس)

- قشطة طازجة

- البهارات(ملح،فلفل أسود،فلفل حار،أوريغانو،سنوت،ربع قطعة ماجي)

- صلصة الصويا

- ويبنج كريم وسط

-  قوطين قشطة عادية

-جبن قلاص

- موزاريلا

الطريقة:

1- اسلقي لمدة نصف ساعه صدور الدجاج في ماي مغلي مع إضافة ملح و حبة (هيل و مسمار) للريحة.

2- وبعد مايستوي الدجاج قطعيه قطع صغار

3- اسلقي المكرونة لمدة 15 دقيقة في ماي مغلي (فيه ملح وزيت) / لازم تكون المكرونة وسط..لاهي يابسة ولا واجد لينة!

4- في قدر حطي زيت والبصل والثوم وحركيه

5- ضيفي الجزر والكزبرة والفطر والفلفل الرومي واخلطيهم

6- ضيفي البهارات واخلطي

7- خففي عالنار وضيفي الدجاج المقطع وملعقتين صلصة الصويا وملعقتين قشطة طازجة واخلطيهم لين تتماسك خلطة الدجاج

8- بعد ماتستوي المكرونة احشيها بخلطة الدجاج ورصيها في صينية البايركس

9- في الخلاط حطي (علبة ويبنج كريم وسط+4 ملاعق جبن قلاص + قوطيين قشطة +اوريغانو+شوية ملح) وصبيه عالمكرونة وانثري موزاريلا

10- حطي البايركس في الفرن وولعيه من فوق بس لين يتحمر..

وفيه ألف عااافية

يميمييميمميمييييي

نوتيلا تشيزكيك

نوتيلا تشيزكيك

المقادير:

-16 حبة اوريو

-5 ملاعق طعام زبدة غير مملحة (سايحة)

-علبة جبنة فيلاديلفيا

- 10 ملاعق طعام نوتيلا (يعادل غرشة كاملة ؛نفس اللي في الصورة)

-ملعقة طعام فانيلا

-ويبنج كريم (علبة صغيرة)

-بندق مطحون

للتزيين:كريمة جاهزة+بندق مطحون

الطريقة:

1- شيلي الكريمة من حبات الاوريو(اكليهم :P ) واخطلي البسكوت في الخلاط.

2- حطي في ملة متوسطة الاوريو المطحون وضيفي عليه ملاعق الزبدة السايحة واخلطيهم بالملعقة لين يتماسك الاوريو وخليه على جنب.

3- في خلاط؛ اخفقي فيلاديلفيا و النوتيلا وعقب ضيفي عليهم الفانيلا،ولم يختلطون عدل ضيفي عليهم الويبنج كريم

4- في قلاصات صغار رصي طبقة صغيرة من خليط الاوريو وفوقها خليط النوتيلا وانثري شوية بندق

5- زينيه بالكريمة وحطي عليه بندق

6- حطيه في الثلاجة ساعتين عالاقل.

وفيه العافية

ترايفل التشيز كيك بالفراولة

جبت لكم طريقة سويت فظيع,واحس انه مناسب جدا للجمعات والبوفيهات المنزلية..
الترايفل هو نوع من أنواع السويتات اللي يبرزه هو شكل تقديمه

وفي أنواع كثيرة من الترايفل,ممكن مع الكيك أو البسكوت,وممكن أيضا بالشوكلاته أو الفواكه..يعني كل واحد وذوقه

حتى في طريقة ترتيب الطبقات الواحد ممكن يضع لمسته الخاصه ويشوف اللي يناسب ذوقه..

وأهم نقطة في الترايفل،أن احنا نحاول نملي الشكل من الخارج..يعني نشتغل أكثر شي على أطراف الملة عشان الشكل يكون واضح وجميل.

نقدم الترايفل في ملة خاصة ويكون اسمها Trifle Bowl

وحاليا ماعندي فكرة وين ممكن نحصل الملة في الدوحة!! اللي عنده فكرة يفيدنا :)

لعمل الترايفل بنحتاج الآتي:

المقادير:

-3 علب باوند كيك أو كيك الفانيليا (جاهز)

-علبتين فراولة (يفضل أن يكون حجمهم كبير)

-علبه بلوبيري أو بلاك بيري

- علبتين بودينج تشيزكيك\فانيليا جاهز Jell-o(أو 8 علب دانييت الفانيليا)

- حليب المراعي كامل الدسم للبودينج الجاهز

-لبن رائب

- علبة ويبنج كريم

-كوبين سكر بودرة

-فانيليا

الطريقة:

لعمل الويبنج كريم:

في الخلاط الكهربائي حطي الويبنج كريم مع ملعقتين فانيليا وكوب سكر بودرة واخفقيه لين يتماسك وعقب اقسمي الخليط نصفين / واتركيهم جانبا

لعمل البودينج:

1- اتبعي الطريقة المكتوبة على علبه البودينج واخفقيه في ملة كبيرة لين يصير كثيف (او حطي علب الدانييت الجاهزة واخلطيها في ملة كبيره)

2- ضيفي على الخليط اللبن الرائب وكوب سكر بودرة ونص كمية الويبنج كريم اللي خلطتيها.

3- اخفقيه بالمضرب اليدوي لين يختلط      / اتركي الخليط جانبا

الطريقة:

1- قطعي الكيك شرايح سميكة شوي

2- قطعي علبه الفراولة شرايح وقطعي علبه الفراولة الثانية مكعبات وخلي كم حبة للتزيين

3- في ملة الترايفل وزعي الكيك بشكل مرتب واهم شي نعبي الاطراف ولازم الارتفاع يكون نص طول الفراولة

4- وزعي شرايح الفراوله عالاطراف بشكل طولي

5- حطي طبقة من البودنج وزيدي عالاطراف بس,عشان الشكل،ام في النص فخليها طبقة عادية

6- وزعي قطع الفراولة في النص وشويه بلاك بيري

7- حطي طبقة ثانية من الكيك

8- وحطي طبقة من البودنج بنفس طريقة المرة الأولى

9- وزعي البلاك بيري واتركي مساحات فاضية للفراولة

10- وحطي آخر طبقة من الكيك

11- اخذي شرايح الفراولة وحطيهم فوق الكريمة عالطرف (في الصورة أنا حطيتهم بطريقة مختلفة،بس أنصح أنج تتبعين طريقة الطبقة الأولى لأن احس شكله بيطلع أحلى..)

12- حطي طبقة بودينج

13- وزعي قطع الفراولة والبلاك بيري في النص

14- استخدمي النص الثاني من كمية الويبنج كريم في تغطية الفواكه بأي شكل تحبين

15- زينيه بالفراولة والبلاك بيري على ذوقج,وانثري عليه سكر بودرة

وبالعافية D: