منتجاتي المفضلة لسنة 2012

اتوقع هذي أول مرة اسوي ريفيو لمنتجات استخدمها..يمكن هذا تغيير وبعد حبيت انوع أكثر في مواضييع البلوق.

أولا خل اقولكم عني وعن روتيني في استخدام المنتجات..

بداية..انا مش مدمنة منتجات..تقريبا يعني اذا حبيت شي خلاص استمر عليه واذا حبيت اغير ممكن آخذ من نفس الماركة او شي قريب
من المنتج..(يسموني في الماركتنج لويال كوستمر خخخخ)..

والحين اخليكم مع منتجاتي المفضلة لهذي السنة،
اللي استخدمتهم 2012 واتوقع اني راح استمر عليهم في 2013 
واللي جربت منتجات افضل تنصحني فيهم عشان اجرب :)

Eau demoiselle - Givenchy Body Spray

 كنت اعشق العطر لأن ريحته صج صج رايقه وخفيفه وتجنن..فلم حصلت البدي سبري ماترددت اني اخذه..وصج ريحته نفس الشي  لكن اخف..استخدمه دايما بعد ماتسبح..واحس ريحته تظل فترة طويلة


شذى/غزال - نعومي

 شنو احب ريحة عطورات نعومي..صج صج روعه..أحبهم للبيت اكثر شي احس سبشل
 .. سبري شذى هذا استخدمته 6 سنين..خذت العطر مرتين ولمعه الجسم واللوشن والشوير جيل والسبب ان فيه ريحة مشموم وياحبني للمشوم والله..يدوخ اللي مايتدوخ خخخخ
فالحين خذت السبري عشان اعيش في نعيم خخخخخخخ
وبالنسبة لغزال..أيضا قبل خذت العطر وعجبني فقلت هالمرة اخذ البدي سبري
هالاثنين من ممتلكاتي الغالية ومتأكدة اذا خلصو لازم اخذهم مرة ثانية <3


Nail Polish Remover - Bourjois

 مزيل المناكير هذا ازاح عقدة المناكير عندي
اكيد كلنا نحب المناكير..لكن مانحب نمسحه وسالفه وننظف الف مرة
تخيلو هذا المزيل مجرد تحركين فيه صبعج وتطلعينه مرتين وبعدين بكون بدون لون خالص!!!
! هو داخله اسفنجه واسيتون وانا شفت نفس هالمنتجات قبل لكن بصراحة كانت سيئة وماتشيل المناكير عدل
والحلو في هالمنتج ان مايحتاج تشلين قطن معاج عشان التنظيف
وايضا ينفع للشنطة بدون ماتحاتين انه ينكت
وأخيرا ينفع للسفر لأنه صغير ومفيد وعملي 
 يعني اتوقع هالمنتج خلاص لازم يكون عند كل بنت تعشق المناكير لأن راح يخليها تعشقه زيادة..ويريحها من مشاكل الاسيتون العادي
ههههه بصراحة صار عادي عندي احط لونين في اليوم..

Flake Away Scrub - Soap&Glory

 خذته جي بالصدفة لاني كنت محتاجة سكرب ولاني احب سوب اند جلوري
لم جربته اول مرة تضايقت انه طلع زيتي جدا..واحس الشور صار كله زيت ويزحلق هيهيهيهي
بس عقب الشور عجبني انه خلى ريلي صج ناعمة ورطبة
واللي خلاني احب المنتج اكثر..ان ثاني يوم كان عندي برزنتيشن ولم جيت انا والقروب نقدم البرزنتيشن واحنا متوترين وجي، قلت لهم !!اشم سوب آند جلوري ترى
كلهم طالعوني ب(ويرد) فيس..لان شدخل
ههههههه عاد عقب تذكرت اني استخدمته ليلة البرزنتيشن وطلعت ريحته تفوح جي
فادمنته زيادة لأني اموت في ريحة منتجاتهم.


Fix - Mac

هذا السبري مثبت لبعد المكياج..
!يعطي فنش حلو..يعني  يعطي حيوية للوجه
صار لي اكثر من سنه استخدمه وان شالله قريب باخذ علبه جديدة لان احس صرت ماعرف احط مكياج بدونه..احس ان في شي 
ناقص!


 Cleansing Milk - Nivea 

قبل كنت اشيل المكياج بصابونة ديتول..وكنت اكره سالفه اني اشيل المكياج بالصابون..ملل ولوعة
لكن عقب اخت ريلي انصحتني بنيفيا وانه يشيل المكياج عدل..وجربته وبصراحة صج صج ماعرف شلون كنت عايشة بدونه..
استخدمت قوطي صغير ولم خلص جربت لوريال الازرق لكن عقب رجعت لنيفيا لأن حسيته يرطب الويه اكثر..
وطريقة استخدامي له..
اني امسح المكياج بفاين عالخفيف
عقب بقطن امسح بنيفيا الوجه كامل
وعقب اغسل وجهي بالماي بس
واخر شي امسح ب بايوديرما عشان اتاكد ان كل شي صار نظيف
وبس والله وايد مرتاحة لهالمنتج :")

Bioderma 

خذت بايوديرما من أكثر من سنة من الصيدلية
طلبت من اللي تشتغل اهناك ان تعطيني اي شي يخلصني من هالحبوب اللي معقدتني
هههههه كانت حالتي النفسية تعبانة والله واجرب كل شي بس عشان افتك من الحبوب
عطتني ذي ومسحت فيه ويهي كذا مرة وحسيت ان من الغباء ان هالمنتج يكون للحبوب!! مادري ليش بس حسيت انه خفيف مثل الماي وعقب خليته على جنب
ولكن قبل فترة...6 شهور يمكن وانا اشوف اليوتيوب شفت ان البنات ميتين عليه بس على انه مزيل مكياج!
واهني حزتها اكتشفت ان انا استخدمته للسبب الغلط
وعقب قلت بجربه لازاله المكياج..صراحة ماعتبره مزيل مكياج لان ماينظف عدل
لكن اللي حبيته اكثر شي..اني امسح فيه ويهي بعد مانظفه من المكياج..لان حزتها صج اقدر اعرف اذا ويهي خالي من الشوائب وبقايا المكياج..يعني هالمنتج ساعدني فهالشي
 وبعد احس يكون حلو اذا  امسح فيه ويهي في نهاية اليوم عن البكتيريا وجي..لان هو عبارة عن ماي تقريبا!
وشوفو حجم العلبة..وايد حلو الحجم ينفع تاخذونه معاكم كل مكان وخصوصا للسفر صغير!

Deep Sleep Spray - Body Shop

 انا انسانة اؤمن جدا بالاروما ثيربي
ولم شفت هالسبري اللي هو للجسم والمخدة وقعت في حبه من اول نظرة
لن كنت حزتها تعبانة وهلكانه من الجامعة فأبي شي يعطيني راحة معنوية!
وكنت ارشه عالفراش والمخدة لم اغير المفارش او قبل مانام وصج صج صج كان يعطي الفراش ريحة حلوة ويدخلني في موود مرييييح..ان ودي اغرق في المخدة مادري شلون
بس للأسف الحين مش موجود في بودي شوب كلش :(
بليز اللي يعرف وين اقدر احصله يعطيني خبر..لان باقي شوي ويخلص :(


Nail Polish Remover pads 

بالنسبة لي مزيل المناكير شي مهم لان احط مناكير وايد

فاحس هالمناديل مفيدة جدا اني احطها في شنطة وماراح تاخذ مكان

وخصوصا اني لم اروح بيت ابوي اختي اهناك عندها فقر مزيل مناكير فاتوهق احيانا ><"

واللي عجبني في هالمناديل خصوصا ان هي متينة ومليانه اسيتون..يعني يمكن منديل واحد يشيل 10 اظافر

خذت هالمناديل من تارجت في امريكا لكن اتوقع موجودة في موقعهم عالنت او تقدرون تاخذون ماركة ثانية من امازون :)

وبس :)

رايكم بليز ^_^