صور أثاث واكسسوارات ماكنزي جايلدز

السلام عليكم ورحمة الله وبركاته

حبييت اشاركم بصور صورتها لاثاث واكسسوارات ماكنزي جايلدز Mackenzie-Childs لم كنت في امريكا العام..كان بالضبط في قسم الاثاث في نيمان ماركس

! احب ماكنزي جايلدز لان احس قطعهم ثمينة وكل قطعه مصبوغة باليد فصعب ان تحصلون قطع متشابهة..

وبعد لان دايما اتخيل مطبخي الحلم يكون اسود وابيض واحمر (اللي راح يتنفذ ان شالله قريب 3> ) فاحس باستخدام اكسسوارات ماكنزي جايلدز اقدر انفذ هالشي وحتى اثاث الحدايق عندهم بالوان تجنن تفتح النفس! 

انا تكلمت عن ماكنزي جايلدز في بوست سابق تقدرون تشوفونه اهني 

اقرب فرع فالخليج لمكنزي جايلدز موجود فالكويت ويوصلون الاثاث لاي دولة فالخليج

وفي قسم لماكينزي جايلدز في لندن (هارودز)

والمحلات الرئيسية موجودة في نيويورك وفلوريدا (شوفو عناوينهم اهني)

وتقدرون تشترون اكسسواراتهم من هذي المواقع/المحلات:

Saks Fifth Avenue

Nieman Marcus

Harrods

C Wonder

لم كنت في دبي محل C Wonder لفت انتباهي جدا جدا..كنت في بلومينغديلز ادور وفجأة شفت مكان جي ملون ويفتح النفس وفيه اكسسوارات للبيت والمطبخ وفيهم احرف وحركات تونس وقلت بشاركم لان يمكن في حد مثلي يحب هالسوالف *ـ* احسه للناس اللي يحبون الالوان اللي فيها حياة وتعطي نشاط :)

وفي فرع ثاني في مول الامارات ويعتبر أكبر وفيه اشيا اكثر مثل الملابس والاكسسوارات..ويقدرون بعد يحطون لكم الاحرف اللي تبونها على بعض أغراضهم..المحل في الاساس امريكي واللي يميزه ان يوفر للزباين بضاعة تمثلهم بتوفير اشيا خاصة فيهم عن طريق الاحرف المطبوعه او المحفورة او المطرزة وبالالوان اللي يحبونها..

C Wonder - Taxi TV from NW on Vimeo.

  الاشيا اللي حبيتها من موقعهم

Beach Day Theme

Website:

http://www.cwonder.com

حبييت! (١)

  نويت بين فترة وأخرى اني اضيف لكم اشيا حبيتها فمواقع النت،يعني اشاركم بالاشيا الغريبة اللي احصلها وتعجبني ^ـ^ اضغطو عاللنكات عشان تعرفون وين تقدرون تحصلون هالاشياا.. 

نبدأ بالاكسسوارات والفلات :P

1 ERICKSON BEAMON حبييت هالشغابة للمناسبات احسها راقيه

2 MONICA VINADER الفتت نظري هالسوارة وفي منها الوان! ترى وايد حلوة فاللبس
3 MOSCHINO هالفكر لفت نظري من اول ماشفت الكولكشن فالفاشن شو! غريييب وعبيط بشكل مب طبيعي وانتشرت كفرات تقليد شكثر منه حتى قبل ماينزل الاصلي!
4 Charlotte Olympia بما ان مشتطة هالفترة للاشيا الصيفية احس سلبر شارلوت اولومبيا كيووت للصيف وشكله عملي

طاولة الطعام

1 French Laundry Home |  2 Oscar De la Renta

حبييت هالالوان للربيع أو الصيف..مثل ماتلاحظون الوان تفتح النفس وغالبها الفوشي والاخضر!

1 Dori Tablecloths | 2 Lenox Dinnerware | 3 Baroque Dinnerware 

واايد عجبني مفرش الطاولة حسيته أنثوي ويجنن و تخيلت انه راح ينفع لحفلة شاي للبنات وبالنسبة لذوقي العادة أميل للألوان الصارخة لكن لم شفت هالمفرش قررت ان اختار الوان الباستيل ههههه (ماعرفتني صراحة) وصج حسيت الواان رايقة وقلت حلاة الطاولة بورد البيونيز اللي تشوفونه في الصوره!

موضة الأناناس!

تتذكرون مرة وحدة العالم كله هب عالبومة؟ ولا عالثعلب؟ هالفترة لاحظت ان هابيين في الأناناس هيهيهي شي غريب بس بصراحة هالفاكهة مظلومة فزين حطو عليها السبوت لايت.

فكرة الاناناس جات من التروبيكال فاشن (موضة المناخ الاستوائي) اللي يستخدمون فيها الوان صيفية ومشرقة وحلوة ^ـ^

والشي اللي خلاني صج الاحظ الاناناس في اسواقنا لم رحت زارا هوم من فترة ومنزلين اشيا صيفية تجنن ومنها
اكسسوارات الاناناس!

شفت نفس القلاص في تمبلر هعهع

انا مشتطة على هالصيف لأنه بيكون اول صيف وانا متخرجة وبدون كورس صيفي فناوية ادخل نفسي فمود الصييف بكل  حذافيره ولعل الاناناس شي من الاشيا اللي بتحسسني بمتعه الصيف..وعلى فكرة اذا تبون احلى والذ اناناس في قطر روحو ميغامارت الحب <3

عطر دولسيه من دولتش آند جابانا

 نزل عطر جديد من دولتش اند جابانا اسمه دولسيه , Dolce، وعجبني شكله والريفيوز عنه وقلت اشاركم لأن صراحة عشقي لعطورات دولتشه اند جابانا لاينتهي..يعني تقدرون تقولون كبرت مع عطوراتهم وكل عطر له ذكرى حلوة لأيام حلوة مرت فحياتي ولو تقولون لي شنو العطر اللي ممكن تشترينه ١٠ مرات راح يكون دولتش اند جابانا لايت بلو او ذا ون بالاضافة لمس شيري من ديور هعهع احبهم ^ـ^

لفت نظري العطر حسيته صج انثوي وللربيع، وفعلا لم قريت عنه الكونسبت مال العطر هو "فيمنن آند فريش" 

دولسيه

تصميمه راقي وفنتاج ويبين لون العطر داخل ولونه هاااادي وحلووو وآخر شي مثل مالاحظتو في وردة جميلة عالغطاة احس كشكل روعه ^ـ^

وبالنسبة لمكونات العطر فهو يتكون من 

Neroli Leaves, Papaya Flower, White Amaryllis, White Daffodil, White Water Lily, Cashmeran, Musky Notes, Sandalwood. 

ومتوفر من العطر بودي لوشن وشور جل:

صور من الحملة الاعلانية للعطر

حاليا العطر متوفر في دبنهامز ..

بالنسبة لسعره يبدأ من ٢٥٥ لل٣٠ مل ويختلف على حسب الحجم.

انا متشجعه اجربه من قلب *ـ* انتو شرايكم؟اذا جربتوه عطوني فكرة اذا يستاهل او لا

Update: العطر ريحته حلوه في البداية..بس خلال نص ساعه تختفي! فالواحد يشك فيه صراحة مب نفس باقي عطوراتهم القوية والثابته