افتحو نوفو سينما في اللولوة قطر يوم الاثنين تاريخ ٢٨/٧/٢٠١٤ ، كان الافتتاح في وقت مناسب الا وهو اول ايام عيد الفطر وخصوصا ان الشعب تقريبا كان محروم من السينما لمدة شهر لول :P
شخصيا كنت انتظر الافتتاح من فترة طويلة لان حسيت جو السينما راح يكون مختلف جدا بما انه خارج المجمعات..يعني اتوقع لايام الشتا تمشي في الجو الحلو ومطاعم جديدة وسينما في مدينة سنترال! وااو صراحة
وحبييت اذكر لكم تجربتي للسينما ثالث يوم العيد، وكنت متشوقة أجرب سينما ٧ ستارز لاني اعشق تجربة البريميم سويتس في ريل سينما دبي، في البداية كنت اقارن كل شي بسينما ريل وطبعا تفوقت ريل سينما من عدة نواحي..فقلت الافضل اتكلم عن سينما نوفو مقارنة بباقي سينمات قطر.
طبعا احنا فقطر ماعندنا VIP الا في الستي سنتر وخدماتهم زينه من ناحية ان الكراسي مريحة لكن ماتتحرك ويجيبون لكم اكل للكرسي وتتوفر دورات المياه داخل السينما.
بالنسبة لنوفو سينما
كان حجزنا في البداية عن طريق الموقع وسعر التذكرة للشخص الواحد ١٥٠ ريال، وبعدين رحنا السينما ووقفنا في المواقف اللي جنب مواقف سبينيز، واول ماوصلنا اكتشفنا ان في فاليه (تروحون عند باب السينما وهم يوقفون لكم السيارة) لول،
المهم اول مادخلنا استخدمنا جهاز خاص طبع لنا تذكرة السينما كانت عبارة عن "فاتورة"
وعقب دلونا على لاونج خاص بال٧ ستارز..(مكان اللوانج اول ماتدخلون يكون على يمينكم)
شخصيا حسيت ان القعدة مش مريحة..لان عرضنا كان مليان شباب فتخيلو مسوين لكم قعدة كأنها صالة يعني احس كان اوكورد..انا مادري يمكن بنات عندهم عادي بس انا ماحب جي اقعد كأني فالبيت وشباب يميني ويساري.. المهم كان العرض ١١ وتقريبا دخلونا السينما ١١ و ٥ دقايق ... وقبل ماندخل طلبت لي فانتا وناتشوز وهم جابوه لي لم بدأ الفلم..
المكان اللي قعدنا فيه هو اول كرسي لم تدخلون على طول ..يكون تحت واعتبره صراحة مكان سيء ولازم يحطون عليه بلوك!
لان قاعة السينما صغيرة والشاشة كبيرة (انصح يصغرونها عشان يرتفع شوي العرض) واللي يجيبون الاكل مرو جدامي فوق ال٥٠ مرة وكان شي مزعج وضايقني وانا اشوف الفلم، وللامانه هم كانو متفهمين هالشي فعلى كل روحة ورجعة اشوفهم يدنعون بس الحركة المستمرة جدام الشاشة مزعجة جدا واتوقع اللي قاعدين فوق ماعانو من هالشي!
المهم بغض النظر عن هالاشيا..أول مادخلنا عطونا برنوص(شرشف) يعني اذا بنرقد وحركات لول، وكان في ايباد على يمين الكرسي تقدرون تطلبون منه وتدفعون سواء بالبطاقة أو كاش وهالشي واايد عجبني وحسيته حديث ومتطور! وفي مينيو خاص للسفن ستارز فيه وجبات رئيسية..وهالشي حلو للي ماعنده وقت يتغدى أو يتعشى قبل أو بعد الفلم.. خلاص يعني بوقف تهريب برجر ماكدونالدز في شنطتي نفس قبل ههههههه.
وغير الوجبات الرئيسية في كريب وحلويات منوعة متوفرة ايضا في باقي السينمات فاحس جد خيارات منوعة وراح ترضي عدة اذواق.
وغير الاكل قدامكم صينية ممكن تحركونها وتحتها في زر عشان تحركون الكرسي وتخلونه مثل السرير.... هالشي عجيب بس شخصيا ماستخدمته لان ماحبيت اتسدح والاوادم عشرين الف مرة يمرون جدامي! ..يعني من صغر السينما غصبا عنهم لازم بيمرون عند ريولي :/ ... فعشان جي مانصح اللي تبي تاخذ راحتها تقعد تحت عند الباب...واحس الكرسي اللي فوق بينحجز قبل العرض بشهر هذا اذا ماسوو عليه مزاد (لا استهبل لاتسوونها ههه ).
وفي النهاية كانت تجربة حلوة وجديدة علينا في قطر
لكن احس مازالو يحتاجون شوية تعديلات..وياريتهم من البداية فكرو يكبرون السينما او يسوون عالاقل صالتين ٧ ستارز عشان مايكون الحصر على فلم واحد لمدة أسبوع أو اسبوعين..
وبالنسبة للسعر اعتبره مرتفع شوي ومب لهدرجة يسوى..واتوقع مستحيل مثلا انا وزوجي كل اسبوع نروح سينما سفن ستارز وندفع ٣٠٠ للعرض الواحد أي مايعادل ١٨٠٠ في الشهر وباقي السينمات ماراح ندفع اكثر من ٣٠٠ ريال في الشهر الواحد..فشخصيا احس هالسينما راح تكون فظيعة للأعياد والمناسبات أكثر شي..يعني هاي رايي الشخصي وكل واحد يقضي يومه بالشكل اللي يحبه ويريحه.
وأخيرا في نوفو سينما صالات عرض ثانية منها آي ماكس وسينما عادية..وعرفت ايضا ان الكراسي اللي تكون فوق سعرها أغلى من اللي تحت بدون أي اختلاف في الخدمات...وهالشي ضايقني لان احنا دايماا نحب نقعد فوق :"(
بس اتوقع ارتفاع اسعار التذاكر جاية من مكان السينما لانها في اللولوة يعني للرفاهية وهيك :)
ــــــــــــــــــــــــــــ
Novo Cinema
Location: (The Pearl Qatar-Medina Central)
Instagram: Novocinemasqtr
يعطيج العافيه
ردحذفيبدون ان السينما هذي مخصصة لاصحاب الرفاهيه علا مااظن