هيلووو

شلون كان رمضان معاكم؟ او بالاحرى شلون كنتو فيه لول؟

ان شالله كل شي تمام وان شالله كان هالشهر نقلة نفسية لكل شخص..

واحب اعتذر طبعا لاني ماكتبت اي شي في البلوق خلال رمضان بسبب ظروف صحية ولان ماعندي خدامة فكنت انا اشتغل فالبيت وكلش مب ملحقة لا على طبخ ولا ترتيب وتعرفون صعبة الواحد يشتغل في نهار رمضان والليل جدا قصيير فالحمدلله على كل حال عدى الشهر على خير وقدرت عالاقل احافظ على العبادات أكثر من اي شي مضى فهالشي يسعدني ولله الحمد..

المهم حبييت اراضي اللي كان يدخل البلوق ويطلع زعلان لان مايشوف شي جديد بهالبوست هيهيهي

وراح اتكلم عن استعدادي للعيد وخصوصا الاهتمام بالبشرة والجسم قبل العيد.

مثل ماقلت لكم كنت تعبانه طول الشهر فكان صعب علي ان اهتم اهتمام يومي..كنت احاول احيانا لم اتسبح اسوي سكراب وجي لكن بالنسبة للوجه اهملته بشكل مش طبيعي وصار ناشف ومادري شلون صارت عندي حساسية! :(

فحزتها قلت لازم قبل العيد اسوي حفلة حق ويهي ولا المكياج اليومي فالعيد بيدمره زيادة هيهيي

خلونا نبدأ ^ـ^

بالنسبة للاهتمام بالبشرة:

هاليومين غيرت من غسول بوندز لغسول اوريجنز لان احسه مريح للبشرة وهالشي انا محتاجته حاليا

وبعدها سويت سكراب بكيت سمرفيل ووايد مرتاحة لهالسكراب هالفترة.

وبعد السكراب استخدمت ماسك اوريجنز بالفحم لتنظيف المسامات..وفعلا ماسك حلو لكن بالنسبة لي لازم استخدم كلاريسونيك عقب مانظفه عشان اشيل بقايا الماسك من المسامات (لان لون البقايا اسود وواضح) لوول ..

وعقب ماخلص ارطب بمرطب كيت سمرفيل...انا خذته لان عجبتني حركته في طريقة استخدام الكريم جدا نظيفة بدال مانحط صبعنا داخل العلبة (صورة توضيحية تحت) واحس يرطب بشرتي بشكل حلو..لكن بصراحة ريحته شوي ماتشجع (ريحة برودكتس) فناوية اغيره بكريم ثاني بعد فترة!! اذا عندكم اقتراحات لكريمات ثانية فيدوني ^ـ^

واخيرا..زيت كيلز قبل النوم واايد احبه وارتاح له واحسه يرطب بشكل عميق.

وطبعا يوميا احط الفازلين..هههه خل نكون حقانين يوميا يوميا احتاج احطه مرتين عشان تتعدل شفايفي يعني الصراحة ماحسه معالج..مجرد يخفي الجفاف والتشققات واول ماينشف كل شي يطلع مرة ثانية..لكن بعد جربت غيره شكثر وهو لحد الحين افضل! اتوقع الجفاف اللي عندي من قلة الفيتامينات او شي :|

مرطب كيت سمر فيل

ماسك (جرين تي سموثي) جابته لي صديقتي من تايلاند وهو عبارة عن ماسك شاي اخضر نخلطه مع الماي عشان يصير نفس السموثي..وفايدته انه يرطب البشرة فحبييت اخليه ليله العيد قبل مانام.

وبالنسبة للجسم الحمدلله بشكل اسبوعي احاول اسوي تقشير..باستخدام سكراب فرانك وقفاز سوب آند جلوري! ااه يجنن شوي عليه واايد احب استخدمه لان ريحته قهوة وانا اعشق القهوة...واخيرا عقب الحمام مرطب نيفيا.

هاي شكل سكراب فرانك

وبالنسبة لشعري فكلمة لاتعليق لاتوفي حقه!! بصراحة احس لاني تركت شامبوهات الجمعية وصرت اشتري الشامبوهات العالمية ومالت الصونات اللي المفروض انها تكون اعلى جودة لكن للاسف احس شعري مب قاعد يستحمل هالمنتجات وشعري اخترب حتى لو حطيت كوندشنر مافي فايدة (تحول من شعر طبيعي كأنه مستشور إلى شعر احتاج احط فيه الف منتج واستشوره عشان يكون مرتب للبيت)..فالحين احاول ارطبه بالزيوت واستغني عن الكوندشنر والمنتجات قد ماقدر..

ووايد حبييت زيت فاتيكا يرطب وريحته حلوة، استخدمته من ١٠ ايام تقريبا وتعدل شعري شوي..ومن ٣ ايام استخدمت زيت دابر املا والصراحة شعري تغير ورجع نفس قبل هادي ومب مشوط خخخخ بس طبعا مانصح احد يستخدمه قبل العيد لأن ريحته اتم اكثر من يومين..فحاسبو لان ريحته مب حلوة.

وأخيرا..هالمنتجات اللي راح استخدمها لم اسوي شعري فالعيد