الأحد، 28 يونيو 2015

الدعايات الكويتية فرمضان ٢٠١٥!

الدعايات الكويتية فرمضان هالسنة تحفة تحفة!! كل دعاية تقول الزين عندي
ماشالله عليهم مبدعين بشكل مش طبيعي..والله احيانا اتملل واكتب فيوتيوب دعاية زين ولا دعاية شرمبي والخ..
وحتى لم اشوف التلفزيون على الراي مثلا...صرت ماغير حزه الدعاية بس عشان اشوف شمبدعين لنا :P
واللي يميز دعايتهم تحسونها صج صج من حياتنا اليومية وعلى آخر التحديثات!
فحبيت اشاركم الدعايات اللي حبيتهم ، واتوقع نالو على اعجاب وايد ناس.

١- دعاية شرمبي



قمبري في رمضان هههه




٢- دعاية الكويتي ماينسي (كواليتي نت)






صج احس المغتربين رمضان صعب عليهم..واتوقع اللي للحين برع يدرسون فهالفترة ماخذين صيفي ويمكن ربعهم ارجعو حق اهلهم..فشي حلو ان مانسوهم وتذكروهم بهالفيديو..حبيييت


٣- ولد الديرة (فيفا)





اول شي شدني فهالدعاية الألوان..وفوزية دريع ياعيوني هههههه


٤- فطاطري سعاد (طلبات.كوم)




والله العظيم اضبطوها...صج صج مأسااة لم نطلب ويقترحون عليكم الف شي وشي خصوصا كنتاكي ههههههههه
واصلا انا من زمان صايرة دايما اطلب من طلبات بس لان مالي خلق اتصل واشرح...
صج حبيت الدعاية...


٥- معدنك طيب (شركة اوريدو الكويت)





٦- مهما يكبر همك، الله أكبر (شركة زين)

 جميل جدا ان فكرة الفيديو كاهداء للدول العربية التي تعاني في هالفترة
من المغنين من مختلف دول العالم العربي
 -ـ-ماعدى مقطع الرابر ماحبيته صراحه


وبعد دعاية زين نعرفك زين حبيتها...أكثر من نعرفج زين

شوفوها

الاثنين، 22 يونيو 2015

السفر مع طفل رضيع

السلام عليكم ورحمة الله وبركاته

انقطعت عن البلوق فترة لأن كنت تعبانه ومشغولة في الاشهر الأخيرة من الحمل وكان صعب جدا جدا اني اقعد قعدة حلوة واكتب على رواق..وبعد الولادة الله لايوريكم...ماكان في وقت حتى ان احك راسي!
اليوم وفجأة عزمت ارجع اكتب شي في البلوق لسببين..
السبب الأول ان انا فعلا محتاجة انتج شي فحياتي ولا بستخف والبلوق هو الشي الوحيد اللي يخليني انتج واشوف انتاجي جدام عيني!
السبب الثاني لأن الموضوع اللي بتكلم عنه كنت اقرا عنه وااايد وااايد واااااااااااااايد بشكل ماتتخيلونه!وللأسف ماكنت احصل معلومات حديثة ووافية عن السفر مع رضيع..
 والآراء كانت متضاربة بين اللي يقول حرام ياهل يسافر توه صغير واصلا هو ماراح تفرق معاه وليش تربطون نفسكم وتحدون انشطتكم مع الياهل والخ
وناس يقولون ان السفر مع ياهل رضيع مافي اسهل منه وراح تكون اخف سفرة مع الياهل في هالعمر(اقل من ٦ شهور) لانه مايبي شي غير حليب وتبديل..ماراح يحن ولا يحبي ولايراكض ولا شي

يعني الآراء تدوخ صراحة...لكن انا قررت اخذه معاي للأسباب التالية (المناسبة لي) وممكن تناسب غيري او لا!

١- لان وايد اوسوس ان محد بيعرف له وبيفهم له كثري..ومحد بيكون حريص عليه كثري..

٢- امي كبيرة ومشغولة وماراح تعابله الا ربع اليوم..يعني تقريبا بيظل اغلب الوقت عند الخدامة باشرافها..وانا ماكان يهون علي يظل ١٠ ايام اغلب الوقت عند الخدامة وتعتني فيه لان اذا انا امه اطفش وماقدر استحمل يوم كامل..فشلون الخدامة؟ 

٣- ارضعه حليب طبيعي واكره الشفط وماتوقع ان اقدر اشفط بكميه تكفيه لهالمدة لان اصلا ماعندي وقت اقعد قعدة محترمة واشفط له.. فاني اخذه معاي اسهل بوايد!

٤- لان كنت خايفة اني اسافر وعقب اشتاق له واتضايق واتحسف وتخترب نفسيتي وحزتها مايتحقق الهدف من السفر ><"




تجهيز شنطة البيبي للسفر
قاعدة في تجهيز الشنطة (لاتحطون فبالكم ان تكملون الاغراض من المنطقة اللي مسافرين لها/جهزو كل حاجاته قبل السفر) 

* بما ان كان عمره شهرين ونص اغلب ملابسه كانت Overall مع جاكيت خفيف للجو+قبعه.

* خذت الملابس شوي اقل من عدد الايام لان كنت ناوية اغسل اهناك في احدى الشقق اللي سكناها،بس الصراحة انا انصح تاخذون على عدد الايام بالضبط وكمن قطعه زيادة،لان الواحد ماله خلق يغسل ولا يروح يتسوق حق الاشيا الناقصة والضرورية.

* تجهيز عدة السباحة (شامبو/صابون/زيت/فوطة/اسفنجة)

* لحاف للنوم + مهاد Muslin (استخدمته لتغطية العربة عن الشمس والهوا البارد)

* كيس النوم Sleeping bag 
هالشي خذته استعباطا قبل ماسكر الشنطة..بس ماتتخيلون شقدد فادني احس مهممممممممم وايد! لان مفارش سرير الاطفال تكون مستهلكة..وغالبا تكون للي اعمارهم سنه وفوق من ناحية الترتيب ومادري الصراحة احس خرابيط..فكنت انومه فالكيس فالمنز أو ان اذا ياته حالة الحنة الليلية احطه جنبي اذا كل شوي بيقعدني..اسهل!

*حاجات البيبي اللي حطيتها فالشنطة الكبيرة وبعض الاشيا نقلتها بعد الوصول لشنطة اليد اللي نطلع فيها
حفاظ
مصاصة
مرضاعتين
جهاز الشفط
عدة غسل المراضييع (بالاضافة للصابون)
مفرش اسفنجي لتغيير الحفاظات (للتبديل في الفندق)
مفرش ورقي لتغيير الحفاظات (للتبديل فالطيارة،فالحمامات العامة..لان ماحب احطه مباشرة على الاسفنجة اللي الكل يستخدمها حتى لو نظيفة)
مناديل رطبة للجسم (لتبديل الحفاظة برع/او لمسح الجسم)
مناديل لتنظيف المصاصة (لان اذا طاحت برع ماعندكم مغسلة ;P )
قطعه muslin صغيرة او فوطة صغيرة (عشان اقلل من استخدام الفاين،لمسح اي شي..انا خذت ثنتين)
  كل طفل حاجاته تختلف،الام هي الوحيدة اللي تقدر تقرر حاجة طفلها..فممكن تحذفين من هاللستة او تضيفين..على حسب عمره وعلى حسب المكان اللي رايحين له.


شنطة اليد/التبديل


في الطلعات استخدمت شنطة وحدة بس حق اغراضي واغراضه..خذتها من كاث كيدستون الستي سنتر..وهذي ثالث شنطة اشتريها من بعد ثنتين حسيتهم ماينفعون للسفر لان وحدة صغيرة والثانية كبيرة مافيها تقسيمات..المهم اللي خذتها تجنن تجنن ياريت لو في منها نقشه تناسب الاولاد عشان اخذ له حق طول العمر(اما طول العمر خخخخ)..لانها مقسمة بشكل رهيب وايد سهلت علي اشيا
المهم انا كاتبة شنطة يد بس كلش ماشلتها...طول الوقت معلقتها فالعربة لانها ثقيلة وفيها كل شي مهم..احس لو سافرت بدونها حياتي بتكون سلطة! (للعلم ماخذت شنطة المرضاعه ولا الشنطة الصغيرة،اما اسفنجة التبديل حطيتها فالشنطة العودة عشان ابدله فالفندق مثل ماذكرت قبل)

شنو فيها؟

- بدلة احتياطية للطواري
- حفاظات
- مراضييع الحليب
- مناديل ديتول للاطفال
-مصاصة اضافية (مصاصته الاساسية معلقتها فثيابه)
- فاين
- ادول (الحمدلله ماحتجته)
- المفرش الورقي لتبديل الحفاظات
- مناديل ديتول لي
- كفر الرضاعة
- نظارة شمسية لي
- كيمرا التصوير والفيديو
- تلفوني

كل جزء فالشنطة كان مخصص لشي من هالاغراض..فكل شي كان مرتب الحمدلله!

العربة/الكاريير/الطيارة/السيارة


العربة اللي خذتها حق ولدي هي YoYo zen وطلبتها من محل (tenlittletoes) هم اطلبوها لي باللون اللي ابيه ووصلوها للبيت وميزة العربة انها تنلم وتدخل فالطيارة..اول ماخذتها واستخدمتها فالدوحة حسيت بوهقة لان مالها اكسسوارات وجدا بسيطة وحزتها وايد تحسفت لكن لم سافرت صج صج حسيت بقيمتها! 
لان الله يسلمكم في اوروبا الشوارع ضيقة..وكنا احيانا نحتاج نركب ونصعد الدرج لكن لانها خفيفة كنا نشيلها بسهولة ونرفعها وننزلها عند اي عتبة تصادفنا او الرصيف! والكوفي شوبات بعد ضيقة ومليانه ناس فكنا نطويها وانا اشيل ولدي لين نمر بين الطاولات وعقب نفتحها لم نقعد! وفي شوارع تكون زحمة ومليانه ناس وغير بعض الفنادق/المتاحف/الاسواق اللفت مالهم يكون ضيييق مايشيل ٤ اشخاص!! لكن الحمدلله مع هالعربة كنا نقدر ندخل !! يعني صج صج صج وااايد حبيتها ووايد استفدت منها مع ان كلش ماحطيت فبالي الضيقة فالدول الاوروبية قبل ماوديها!

وبالنسبة ان مافيها اكسسوارات..يوم السفر طلبت Hook من تاجرة في انستاغرام (Babyhaven_shop) والحمدلله انقذتني ووصلته لي قبل ماروح المطار..ماشاء الله كان يستحمل وزن الشنطة الثقيل واكياس زيادة! فماحتجت استخدم المساحة اللي تحت العربة وايد.

وتتذكرون المهاد الmuslin كنت موديته عشان امهده بس طول السفرة استخدمته عشان اغطي العربة مثل ماذكرت لكم قبل!
فمشيت حالي وماحتجت مظلة او كفر خاص مع العربة..
 المهم لم رجعت البيت شفت علبة المهاد والا اكتشف ان اصلا هاي مب بس مهاد..من استخداماته بعد لتغطية العربة..صج استانست احب احلل الاغراض بهالشكل *ـ*



وبالنسبة للكارير 
 منتج فاشل للي فعمر ولدي للاسف @@ خذته معاي لكن ماستخدمته مع ان فالمحل قالو لي ينفع للنيوبورن بس حرام احس مافي سوبورت للراس..

الطيارة
البيبي الصغير يعطونه سرير للنوم ومعاه مفرش وكل شي..والحمدلله المضيفات كانو متعاونين معاي فكل شي لان معاي بيبي
بالنسبة للي يخاف من صياح الطفل (انا كنت احاتي هالشي) ترى من مكينة الطيارة ماينسمع شي ههههه حتى انا لازم اركز عشان انتبه على حنته وصياحه.

السيارة
فاوروبا لازم كرسي سيارة خاص بالطفل فاذا كنتو مأجرين سيارة من المطار اطلبو الكرسي، احنا رحنا بتاكسي والحمدلله دبرو لنا كرسي من المطار



خلصنا من الماديات والتجهيز للبيبي
الحين ننتقل للروحانيات وكيف شعوري لاول مرة وانا اسافر مع طفلي؟

هو الصراحة انا ظليت لين يوم السفر متصرقعة ومتخرعة وكنت اقول فقلبي ياريت ماسافرت او ياريت لو اخترت وجهة قريبة وسفرة قصيرة ووايد اشيا خصوصا ان انا أم جديدة ومش وايد متمكنة.

حاولت قد ماقدر ان اقلل من التوقعات، لكن صدمني فديته كان اريح واسهل من ماتوقعت! يعني سبحان الله صج في وايد اشيا ماقدرنا نسويها..بس وجوده معانا كان يغنينا عن كل شي! 

لو اتكلم عن السلبيات..مثل ماكنت اقدر انام في الطيارة كلش..مع انها كانت رحلة ليلية فوايد تعبت..حتى فالفندق كل يوم كان وايد يقوم فلم يصير الصبح واتي وقت الطلعه انا اكون هلكانه وجسمي مكسر لاني مانمت عدل واحيانا لم ابي اشتري شي يصيح ويحن فلازم اطلع بسرعه فماكنت اخذ راحتي..بس كنت اشد على نفسي ومااسمح لنفسي ان اتضايق او اتكدر على هالاشيا واخذ كل شي بشكل ايجابي..وسبحان الله احس الامومة فعلا شي مختلف..يعني خلاص عادي ان مانام وايد وعادي اني ماتسوق وايد..احس يكفيني ان هو معاي وفعلا عطا للسفرة طعم حلو وتغيير عن المعتاد وزوجي يشاركني الشعور الحمدلله حتى هو كان مستمتع بوجوده معانا.

فالنهاية سواء تقررون تاخذون الطفل او لا هالشي راجع للوالدين ١٠٠٪ ومحد له حق يفرض ان تاخذونه او تخلونه..لان انتو اللي راح تكونون مسؤلين عنه وعن سلامته..فمهم تختارون المكان المناسب لان مثلا مع طفل رضيع مافي مجال ان تروحون مكان للملاهي والالعاب والمغامرات..يكفي مكان للتمشي والتقهوي والانشطة الحلوة مثل زيارة حديقة الحيوان،المتاحف،مشاهدة المناظر الطبيعية..
وتبون الصج اللي عندها بيبي صغير (يعني توها والدة) ماتبي جدول مزدحم ولعب وحركة ومغامرات طويلة..لان تكون تعبانه فحلاتها جدول فلكسبل وبسيط وفترة تأمل ترد الروح اللي راحت اول الشهور هههههه!


وهذا مايحضرني حاليا
اللي عنده اي استفسار يتفضل يسأل وانا سعيدة اني اجاوب باللي اعرفه ^ـ^
ووايد استمتعت وانا اكتب البوست فشكلي ماراح اقصر واحاول اكتب اي شي استفدت منه عشان افيدكم وبالمرة اسجل ذكريات حق ولدي يقراها فالمستقبل هو ومرته :P