الأربعاء، 15 أكتوبر 2014

فطور رايق..صباح رايق

فطوري رايق يعني صباحي رايق

هذا هو شعاري فالحياة!
 الريوق عندي مهم جدا جدا وأحب اتفنن واتلذذ فيه واسويلي أجواء
واذا عبيت الثلاجة بحاجات حلوة للريوق، لازم فالليلة اللي قبل ارقد من وهل من الوناسه ههههههه
فحبييت اشاركم بالاكلات اللي احب آكلها هالفترة عالريوق ^ـ^



Breakfast on Bed | ريوق عالسرير

تسوونها؟؟انا عمري ماسويتها احس فالجامعه جد الواحد مخه متروس مايلحق يفكر فهالاشيا ففكرة اني اسوي ريوق عالسرير كانت فلسته الاشيا اللي بسويها لم اتخرج + لسته الاشيا اللي بتسعدني فحياتي.

وفعلا نفذت الفكرة لكن عقب شهوووور.. المهم مايبيله شي بتحتاجون صينية وتحطون فيها الاشيا اللي تحبونها وجبذا تكون اشيا حلوة ومالحة.. عشان يكون ريوق ريوق بوساعه مش شي خفيف :P
واهني كنت اطالع مسلسل Hart of Dixie وانا اتريق..

الريوق عبارة عن:فول ،بيض وطماط،كروسون،خبز اسمر وفواكه والمشروبات كرك وعصير برتقال
طريقة عمل الفول:
المقادير: (نص علبة فول بالخلطة المصرية+نص بصل مفروم+طماطة وحدة مفرومة +نص فلفل اخضر مفروم+ملعقة طعام بقدونس مفروم+ملعقة طعام صلصة+ملح+فلفل أسود+كمون+زيت زيتون)
الطريقة: 
١-حطي فجدر صغير زيت الزيتون والبصل وحركيهم لين يصير البصل بني شوي
٢- حطي الفلفل الاخضر والبقدونس والطماط
٣- حطي الفول واهرسيه بالشوكة
٤- حطي الصلصة والملح والبهارات واخلطيهم وعقب سكري النار وغطي الجدر لين وقت التقديم.
٥- نصب فوقه شويه زيت زيتون عند التقديم.



!!!كروسون بجبنة فيتا،فواكه،عصير برتقال وكابتشينو نسله وماتذكر ليش حطيت التلفون فالصينية..بس ماظن باكله 

زوووم
هالكروسون كان عذابي لفترة طويلة

طريقة عمل الكروسون بجبنة الفيتا:
١- كروسون سادة نحط فيه (شرايح جبنة فيتا+شرايح خيار وطماط ورشة اوريغانو)
٢- هههه حسيتو انه مجبوس صح؟



ريوق سريع | Quick Breakfast



كروسون بجبنة الحلوم:
١- نشوي الحلوم
٢- نحط فالسندويج جرجير والحلوم المشوي وطماط وخيار ونرشه بشوية اوريغانو
٣- استمتعو..لذيييذ




ريوق خفيف | Light Breakfast


أحيانا تكونون مرتكبين جرايم عظيمة قبل النوم وتقعدون ثاني يوم بطنكم بينفجر لكن لانكم ماشيين على شعار فطور رايق صباح رايق تغصبون نفسكم عالريوق خخخخ 
ممكن تاكلون شي خفيف وحلو ومايغث مثل الخبز ومنتجات الحليب

يعني سلطة ^ـ^





المقادير:
جرجير+خس+خيار+طماط+فجل+زيتون اخضر بحشوة جبنة الفيتا+عين الجمل(اختياري)
وللتبيلة: دبس رمان وزيت زيتون


وبالنسبة للعصير: فراولة وليمون فالخلاط








ريوق مطعم | Restaurant Breakfast

مرة قمت من النوم وفخاطري اوملت لاديوريه :| او اي اوملت جي اصفر ولذيذ نفس المطاعم
بحثت فالنت عن French Omelet 
والحمدلله حصلت طرق حلوة فقلت اجرب اي وصفة..
والصراحة عقب ماكلت الاوملت حسيت نفسي كنت عايشة في عصر الظلمات انا وبيضي المحروق خخخخخخ
والله كنت اتحسب البيض اما يكون ني او يكون بني!!
اللي سويته كان لذيذ بمعنى الكلمة لدرجة اني كنت اكله بدون خبز وهالشي غرييب جدا علي لان مستحيل اكل بيض بدون خبز احس بلوعه بدونه كأني آكل شي مفصخ او حافي مادري الصراحة المهم كان شي يقرفني خخ
فحسيت بانجاز عظيم لم غيرت هالفكرة!

الحين بقولكم الطريقة ولو كنتو تعرفونها وصج انا توني طالعه من عصر الظلمات فاعفو عني هههه
لان لم قلت حق ريلي عن هالاكتشاف قالي واخيرا استوعبتي ان البيض اللي مب محروق حلو لووول


المقادير:
٣ بيضات+ملعقة زبدة+ ملعقة صغيرة ملح+فلفل أسود+خضروات اختيارية..وانا اخترت طماط وبصل وفطر


الطريقة:
 ١- اخفقي البيض والملح بقوة لين يصير قوام البيض أقرب للماي،تقريبا في دقيقة...او لين تعضلين
٢- حطي الطابي على فرن تكون درجة حرارته متوسطة
٣- حطي الزبدة لين تذوب
٤- اول ماتذوب الزبدة حطي البيض وبالشوكة سوي حركات سريعه من برع لين نص البيض لمدة ١٥ ثانية بس
" انا شوي خربطت فهالحركة لان خليت البيض يستوي شوي وانا اقعد اصور ..فضروري تكون الحركة سريعه"
٥- لم تشوفين البيض تماسك وفالنص مازال شوي سائل اقلبيه
٦- وعقب حطي الخضرة فنص البيض
٦-اقلبي نص البيض كأنج تلحفين الخضرة $ـ$ ههه استعبط اقصد نص دائرة
٧- وبيكون الاوملت جاااهز للأكل بس رشي عليه فلفل أسود حسب الرغبة

اقلبيه اذا تقريبا صار جي






الاثنين، 6 أكتوبر 2014

Eatopia Restaurant | مطعم ايتوبيا

Eatopia Restaurant
مطعم ايتوبيا

من اسبوع تقريبا رحت مطعم ايتوبيا الموجود في ذا جيت مول (السلام)، وجد انبهرت ماتوقعته جي..احس كل مطابخ العالم في مكان واحد وهالفكرة أول مرة تكون موجودة عندنا فقطر (مشابهة للمطعم اللي في جاليريز لافييت فدبي)..صح عندنا مطاعم تقدم اكل منوع وعالمي..بس هالمطعم يقدم أكثر من اللي تتوقعونه..يعني أحس جو المكان أكثر من مجرد أكل..تقدرون تشوفونهم وهم يجهزون الاكل ويعرضونه جدامكم وتختارون اللب تبونه وانتو على الستيشن..وعندهم أكل عربي،ايطالي،هندي،سوشي وحلويات ويقدمون ريوق وغدى وعشى وكوفي. 
أول مرة رحته كنت ابي اتغدى يوم السبت وكان مزدحم جدا والجو حاار خصوصا صوب الدرايش (طاولات الطعام موجودة عند الدرايش) فبس خذت لفة وطلعت ماجربت شي ورحته يوم ثاني للريوق..

بالنسبة للريوق.. كان المطعم فاضي ولان مايطبخون شي فعالاقل الجو أفضل (أتوقع هالمشكلة ماراح تكون موجودة فالشتا)..المهم طلبت اوملت وعصير برتقال وريلي طلب حبتين كروسون..

وهذا هو المينيو

خذو لهم وقت لين مايجيبون المشروبات..وعقب ماجابوهم جابو الكروسون بس وانا قعدت انتظر تقريبا ١٠ دقايق ولا وصل طلبي وريلي خلص ريوقه وانا للحين انتظر وعقب ناديت الويتر قلت لها طلبي ماوصل..وعلى طول راحت تشوف شسالفه وخلال ٥ دقايق جابت لي الطلب..صج انبطت جبدي لان مش جاية مطعم عشان اتريق بروحي ><" لكن عموما الاوملت كان حلو فبرد جبدي شوي هيهيي 

اضطريت احط حبة الكروسون الثانية صوبي لان مافي مكان :| عالاقل المفروض تحطهم فصحن واحد


الاوملت مع طماط ومشروم


بس عندي ملاحظة ان طاولاتهم صغار وصحونهم كبار والاكل ضايع فالصحن وغير ان مافي مكان عشان احط شنطتي خير شر فحطيتها عالارض،وعقب غيرنا مكانا للكنبات وصج بعد الطاولة صغيرة للاكل نفسه بس عالاقل ماقطيت شنطتي عالارض وفي الطريق ..فأحس لو يهتمون أكثر من هالناحية وهالتفاصيل راح تتحسن خدمتهم وجودة شغلهم أكثر.






وغير الاكل عندهم جمعية صغيرة فيها سناكس وبهارات وصلصات ومشروبات وبعد اكسسوارات وادوات للمطبخ








بغض النظر عن الخدمة
المكان بشكل عام عجبني وابي اجرب اتغدى عندهم بعد واحس المكان مسلي الصراحة اكثر من قعدة مطعم عادية ^ـ^
فاتمنى لين ايي هاليوم تكون خدمتهم متحسنه أكثر



Contact info:
40206400