Farggi \ فارجي كوفي شوب

كوفي شوب اسباني..أول فرع له أُفتتح في برشلونة سنة 1994 ..

موجود الحين في الدوحة في The Gate في منطقة الأبراج

كان المطعم فاضي وهادي جدا جدا..وهذي هي الاجواء اللي تعجبني

فقررت أجربه..وأول شي ذقته كان "فرابيه كاراميل" وكان لذيذ لذيذ لذيذ..

ومن بعدها كل كمن يوم عندهم ,عشان اتهنى في الأجواء قبل الزحمة وعشان أجرب أكلهم من باب الاستكشاف..وبصراحة عجبني..وحسيت هم أكثر شي متفنين فيه الحلويات والقهوة والاسكريم.

مينيو السويت

فرابيه كاراميل

اسكريم جوكلت وفانيليا

رازبيري تشيزكيك

ساشر كيك(هالكيكة ماعجبتني وايد لأن ماحب الكيك اللي مليان جوكلت)

دجاج مشوي

فيوتشيني

*عندهم بطاقة خصم 10% لبعض الشركات

أفضل 10 عطورات عندي 3>

العطورات بالنسبة لي عالم خيالي أعشقه وماأمل منه.. لدرجة إني أملك كمية كبيرة وأنا من النوع اللي أحب أحتفظ بالغرشة بعد ماتنتهي للذكرى هيهي.لأن كل عطر عندي له معنى خاص سواء يذكرني بمكان معين أو مناسبة معينة..
وأنا أيضا أؤمن أن الانسان مهما كانت عنده كمية كبيرة من العطورات لازم أيضا يكون عنده ذوق في استخدام هذي العطورات!
في عطورات صباحية وفي عطورات مسائية..عطورات تكون أفضل للصيف أو الشتا..وأهم شي عطورات خاصه للبيت وثانية للمناسبات..
بكل بساطة مايصير الوحدة تقعد في البيت بعطر ريحته قويه ومركزة(بارفام) أحس الواحد يختنق..وخصوصا أن هالنوعية من العطورات تستمر لأكثر من 6 ساعات؛وأيضا مايصير الوحده تروح عرس بفستان كشخه وذهب وحاله وجذي بعطر ريحته ريحة بطيخ أو فراولة!.. بس أحس مايصير والله.. وحتى الجامعه والشغل لازم الوحدة تلتزم بعطر خفيف مش قوي عشان ماتخنق اللي جنبها + حرام لو تمشي بعطر ريحته قوية لأن الرياييل يشمون الريحة فيها لو كانت تدرس أو تشتغل بمكان خلط.

طبعا هذي أسس لازم كلنا نمشي عليها أو نحاول بشكل أو بآخر نلتزم فيها..

لكن ذوقنا في العطورات أكيد راح يختلف لأن جدامنا آلاف العطور والروايح..فكل واحد وذوقه واللي يعجبه..
واهني حبيت أعرض لكم أفضل 10 عطورات عندي..

{ 10 }

Wish from LOLLIA

هالعطر بصراحة رشيته على يدي وعجبني شوي لكن ماحسيت انه يستحق آخذه..بس احتياطا كتبت اسمه لأنه مب متوفر في أي مكان..وبعد ماطلعت من المحل بساعتين..بديت اشم في نفسي ريحة فظيعه..ههه حسيت اني ماقدر اقاوم نفسي ..وبعدها اكتشفت أن جمال هالعطر يبين بعد ماتبرد..لكن للأسف كان هاليوم آخر يوم في السوق..وبعدها رجعنا الدوحة..لكن لم سافرت مره ثانية أصريت اني آخذه وكان آخر حبة!!

حاليا نفس الشي ماحب ريحته من البدايه..أحبها لم تبرد.ريحته.واللي يميز العطر ريحة الفانيليا والسينامون القوية

هالعطر متوفر فقط في محلات نيمان ماركس أو في مواقع الانترنت.

 

 

{ 9 }

Usiku from Jo Wood Organics

 

هالعطر أول ماأشمه ياخذني لمكان بعيد..ريحته سبايسي على وودي  على زنجبيل ..أحس يعطيك جو دافي في الشتا والثلج والبرد..خصوصا اني لم خذته كان يطق مطر وبرد شديد ولم شميته على طول ريحني..فدايما هاللحظة ترجع لي لم أشمه..أحب ارشه في البيت ولم ألبس جلابيات..يعني اللي يشم هالريحة بيحس بالحرارة والثقة والأصالة..

 

 

{ 8 }

Flowebomb,Extrait De Parfum from Victor&Rolf

 

هذا نفس عطر فلوربومب القديم بس الفرق أن ذي مركز أكثر,وأحسه أرقى ومناسب جدا للهدايا,حتى علبته من داخل ملبسة بالقماش.

هو طبعا مش رشاش,فماراح يناسب الشنط كلش..فيعني يمكن مايناسب اللي يبونه للشنطه.

 

 

{ 7 }

Gucci from Gucci

 

هالعطر عجبني أكثر من المركز,ريحته حلوة وخفيفة وأيضا مميزة

 

 

{ 6 }

Rose Water & Vanilla Cologne Intense from Jo Malone

 

جو مالون عندهم عطورات مميزة ونظامهم أن تاخذين كذا عطر وترشينهم عشان تكونين لج ريحة مميزة,ماعجبني هالشي لأن عطوراتهم مش رخيصه..والواحد أحيانا يحب ياخذ شي واحد ويكون عملي وفي نفس الوقت حلو..لكن هم سياستهم أن التميز في العطورات باستخدام (عطرين +لوشن) أو كذا عطر...أحس ماتنفع لي هالسياسة..

عموما نرجع لعطرنا..هذا رفيجتي نصحتني بيه..وصج صج طلع عجيب,ريحته قوية جدا لكن في نفس الوقت مريحة اذا خفت شوي,وقريت أن الهام هالعطر جاهم من الشرق الأوسط وتوقعو أنه راح يجذب العرب أكثر..ههه توقعهم في محله!

 

 

{ 5 }

عطر دهن العود من الدخيل

 

عطر عربي مركز شوي,يمكن هو العطر العربي الوحيد اللي عندي وهذي ثاني مره اشتريه..صج أحبه وأحب اعطر عبايتي في الأعياد والاعراس مع العود  أو إني ارشه مع عطر فرنسي..أحس تطلع ريحة مب صاحية..الشي المميز في هالعطر..إني عطرت فيه عبي تجهيزي كلها,وبعد شهر ظلت ريحة خفيفه فيهم بس فظيعه...عشان جي صار يذكرني بذيك الأيام :)

 

{ 4 }

Deseo from Jennifer Lopez

 

هالعطر جاني هدية من انسانة غاليه على قلبي,فاتوقع محبة العطر جات من محبتها  :P

صج عطر عجيب وريحته تحسسني بالنشاط وكنت أحب اتعطر بيه للجامعة..مادري بس جي يحسسني بالتفاؤل.

{ 3 }

شذى من نعومي

هالعطر استخدمه للبيت بس,أحس ريحته صج صج جذابة وعجيبة..

ماعرف بالضبط شنو مكوناته بس أحسه شوية سبايسي وشوية فلورال..وأيضا ريحته قريبة للمشموم بعد..وهالعطر ثانية مره آخذه..والحين قريب بيخلص وباخذ الثالثه..وبتم آخذ لين يسكرون محلهم :P

بصراحه ماستغني عنه! ودايما أنصح صديقاتي اللي بيعرسون أن ياخذونه..لأنه حلو على ملابس البيت.

 

{ 2 }

The One from Dolce&Gabbana

هالعطر يذكرني بأيام ثالث ثانوي,صج شدتني ريحته عند وحده من صديقاتي..وبعدها خذت لي واحد,ومب بس خذته لأنه عطر والناس يحبون يتعطرون والخ..خذته لأن صج أحس كل يوم كل يوم أحب افتح الغرشه واشمه..صج يعني يجذبني وايد وماخذ عقلي..فظيع وايد أحبه..وأحس ريحته مميزة وسبشل والواحد يقدر يميزها بسهولة.

 

{ 1 }

Miss Dior Cherie From Dior

وأخيرا وصلنا لأفضل عطر عندي..أحب أتعطر فيه وايد وايد وخصوصا للمناسبات..ريحته راقية وكلاس وفي نفس الوقت شبابية ..يعني احس فيه كاراميل وسكر وفانيليا ومسك..روعة روعة روعة..

صج هالعطر يعني عطر مقدس بالنسبة لي..ومميز..وأيضا راح يكون من ضمن قائمة عطوراتي الأبدية.

 

 

 

وانتهيت من عرض أفضل 10 عطورات عندي,

ياريت لو أعرف رايكم واذا تحسون أن أذواقنا متشابهة..أحب أعرف شنو هي العطورات اللي ذكرتها تعتبرونها من أفضل العطورات بالنسبة لكم بعد..

 

باي باي :)

ترايفل التشيز كيك بالفراولة

جبت لكم طريقة سويت فظيع,واحس انه مناسب جدا للجمعات والبوفيهات المنزلية..
الترايفل هو نوع من أنواع السويتات اللي يبرزه هو شكل تقديمه

وفي أنواع كثيرة من الترايفل,ممكن مع الكيك أو البسكوت,وممكن أيضا بالشوكلاته أو الفواكه..يعني كل واحد وذوقه

حتى في طريقة ترتيب الطبقات الواحد ممكن يضع لمسته الخاصه ويشوف اللي يناسب ذوقه..

وأهم نقطة في الترايفل،أن احنا نحاول نملي الشكل من الخارج..يعني نشتغل أكثر شي على أطراف الملة عشان الشكل يكون واضح وجميل.

نقدم الترايفل في ملة خاصة ويكون اسمها Trifle Bowl

وحاليا ماعندي فكرة وين ممكن نحصل الملة في الدوحة!! اللي عنده فكرة يفيدنا :)

لعمل الترايفل بنحتاج الآتي:

المقادير:

-3 علب باوند كيك أو كيك الفانيليا (جاهز)

-علبتين فراولة (يفضل أن يكون حجمهم كبير)

-علبه بلوبيري أو بلاك بيري

- علبتين بودينج تشيزكيك\فانيليا جاهز Jell-o(أو 8 علب دانييت الفانيليا)

- حليب المراعي كامل الدسم للبودينج الجاهز

-لبن رائب

- علبة ويبنج كريم

-كوبين سكر بودرة

-فانيليا

الطريقة:

لعمل الويبنج كريم:

في الخلاط الكهربائي حطي الويبنج كريم مع ملعقتين فانيليا وكوب سكر بودرة واخفقيه لين يتماسك وعقب اقسمي الخليط نصفين / واتركيهم جانبا

لعمل البودينج:

1- اتبعي الطريقة المكتوبة على علبه البودينج واخفقيه في ملة كبيرة لين يصير كثيف (او حطي علب الدانييت الجاهزة واخلطيها في ملة كبيره)

2- ضيفي على الخليط اللبن الرائب وكوب سكر بودرة ونص كمية الويبنج كريم اللي خلطتيها.

3- اخفقيه بالمضرب اليدوي لين يختلط      / اتركي الخليط جانبا

الطريقة:

1- قطعي الكيك شرايح سميكة شوي

2- قطعي علبه الفراولة شرايح وقطعي علبه الفراولة الثانية مكعبات وخلي كم حبة للتزيين

3- في ملة الترايفل وزعي الكيك بشكل مرتب واهم شي نعبي الاطراف ولازم الارتفاع يكون نص طول الفراولة

4- وزعي شرايح الفراوله عالاطراف بشكل طولي

5- حطي طبقة من البودنج وزيدي عالاطراف بس,عشان الشكل،ام في النص فخليها طبقة عادية

6- وزعي قطع الفراولة في النص وشويه بلاك بيري

7- حطي طبقة ثانية من الكيك

8- وحطي طبقة من البودنج بنفس طريقة المرة الأولى

9- وزعي البلاك بيري واتركي مساحات فاضية للفراولة

10- وحطي آخر طبقة من الكيك

11- اخذي شرايح الفراولة وحطيهم فوق الكريمة عالطرف (في الصورة أنا حطيتهم بطريقة مختلفة،بس أنصح أنج تتبعين طريقة الطبقة الأولى لأن احس شكله بيطلع أحلى..)

12- حطي طبقة بودينج

13- وزعي قطع الفراولة والبلاك بيري في النص

14- استخدمي النص الثاني من كمية الويبنج كريم في تغطية الفواكه بأي شكل تحبين

15- زينيه بالفراولة والبلاك بيري على ذوقج,وانثري عليه سكر بودرة

وبالعافية D:

ريد فيلفت كيك

السلام عليكم ورحمة الله وبركاته

بشرح لكم طريقة عمل الريد فيلفت،طبعا النت مليان طرق ومقادير مختلفه..بالنسبة لي هذي أنسب طريقه حصلتها..وأكيد عدلت عليها اللي ماناسبني وحسيت أن مخرب عالكيك.

طبعا المقادير لكب كيك العادي..بس أنا استخدمته لعمل ريد فيلفت الجار + كب كيك صغار.

المقادير:

• 1 وربع كوب طحين
• ثلاثة أرباع كوب سكر
• نص ملعقة شاي بيكنج صودا
• نص ملعقة شاي بيكنج بودر
• نص ملعقة شاي ملح
• ملعقة ونص طعام شوكلاته بودر
• 3 ارباع كوب زيت
• نص كوب لبن   (100 مل)
• بيضة وحدة
• ملعقة ونص طعام ملون  الطعام الأحمر
• نص ملعقة خل
• ملعقة ونص طعام روح الفانيليا

الطريقة:

1- شغلي الفرن على 200 درجة

2- حطي الأوراق في صينية الكب كيك

3- في ملة اخلطي بملعقه (الطحين +ا لسكر + البيكنج صودا + البيكنج بودر + الملح + الشوكلاته البودر)

4- في الخلاط الكهربائي اخلطي (الزيت + اللبن + البيض + ملون الطعام + الخل + الفانيليا ) 

5- وأثناء الخلط ضيفي المكونات الجافه شوي شوي لين يختلط عدل

6- صبي الخليط في أوراق الكب كيك -ثلاث ارباع الورقه- ودخليهم الفرن في الرف اللي في النص لمدة 20 دقيقه

7- يكون الكيك جاهز لم تحطين عود خشب في النص ويطلع جاف

للتزيين:

"كريم تشيز فروستنج"

المقادير:

• علبة جبن فيلاديلفيا 200 جرام
• صبع زبدة(غير مملحة)، وخليها على درجة حرارة الغرفة عشان تلين - تقريبا بتحتاج نص ساعه الى ساعه عشان تلين
• ملعقتين طعام فانيليا
• كوب ونص سكر بودرة (يضاف تدريجيا حتى تخف ملوحة الجبن وتحصلين على طعم حلو مقبول ومب مليان سكر)

الطريقة:

1- اخلطي في الخلاط الكهربائي (الجبن + الزبدة + الفانيليا)

2- ضيفي السكر البودرة شوي شوي لين يمتزج

3- حطيه في الثلاجة

4- حطيه في اكياس التزيين وزيني الكيك بعد ماصار بارد

وهذي الطريقة الستاندرد للريد فيلفت كب كيك..

لكن ممكن تبدعين وتحطين الكيك في Jar

ريد فيلفت جار:

1- قطعي الكب كيك شرايح وحطيهم في الجار

2- حطي طبقه خفيفه من الكريم تشيز فروستنج وتقدرين تزيدين شوي عالاطراف بس عشان الشكل.

وكرري لين توصلين آخر شي طبقة الفروستنج.

الكيك الصغار:

أحس هالكيك حلو للعزايم والجمعات..لأنه خفيف وشكله جميل وأنيق D:

بتحتاجين قالب نفس هذا:

23.68$ - Amazon

الطريقة:

1- ادهنيه بزبدة وعقب حطي شويه طحين عشان تقدرين تشلين الكيك بسهولة

2- صبي الخليط ل3 ارباع القالب

3- اطبخيه في الفرن (سبق تسخينه 200 درجة)لمدة ربع ساعه

4-انتظريه لين يبرد كليا بعدها اقلبي الكيك وحطي عليه الكريمة

و فيه ألف عافية..