التسوق و الطعام في دبي

أهلا وسهلا مرة ثانية :)

طبعا هذي تتمة للبوست السابق عن قضائي لاجازة العيد في دبي..واعتبروه الجزء الثاني لن بيكون في جزء ثالث بعد^_^

واسمحولي عالتأخير...امتحانات..بيظل هذا عذري لين أتخرج بإذن الله :)
هيهيهي


(الطعام) :
أولا راح أبدأ بالوجبات اللي طلبناها في الفندق(العنوان\ذا آدريس) من الروم سيرفس, المينيو مالهم كان منوع وحلو..بس بشكل عام أكلهم يبين عليه أن اللي يسويه مش متخصص فيه..يعني مثل الاكلات اللبنانية ماصخه وأحس مش مطبوخة بطريقة لبنانية بحته..والاكلات الهندية مافيها روح واحد هندي مسويها من قلب ولا حتى بهارات هنديه أصليه ..ههه احساس يعني
بس الابداع كان في الاكلات الايطالية!
أخليكم مع الصور..

تيكساس رود هاوس
دبي مول:

طبعا اختيارنا لهذا المطعم لعدة أسباب..أولا..زوجي يحب تكساس ,ثانيا زوجي يحب تكساس..ثالثا..زوجي يحب تكساس خخخخخخخخخ
والسبب الأخير..أنهم مبدعييييييييييييييييييييييييييين في البرجرز..
يعني دخلناه واحنا نتحلم أن ممكن يكون طعمه مثل مطعم Five Guys
والحلو إن ستايل المطعم كاونتري والاغاني كاونتري...حتى في التلفزيون كرة القدم الامريكية..يعني صج الواحد يحس نفسه في تكساس..وحواليه كاو بويز ..

أول ماقعدنا عالطاولة شفنا سطل شكبره مليان فول سوداني محمص..وفعلا هالحركة نفس مطعم فايف جايز..انهم يحطون الفول في أكياس كبيرة والناس ياخذون لهم وبلاش..مادري شالعبره والله.

وهذي وجبتي اللي طلبتها..كلاسيك برجر..بس وقسم بالله أنه كبير وماقدرت ادخله!!
فاضطريت آكل البرجر بروحه والخبز بروحه..يعني صج احس ماقدرت استمتع بالبرجر لكبر حجمه....
كان المفروض اقترح عليهم يصغرونه للناس الغلابه زيي ..

مطعم أجمل في فندق أرماني في برج خليفه..

موقع المطعم هو الوحيد الشي الزين..لأنه عالنوافير..ومكان جيد جدا للتصوير..
الخدمة كانت راقيه وممتازة..بس أكلهم ماعجبني كلش..والاضاءه كانت ميته لدرجة إني ماكنت أشوف شكل الصحن عدل وشنو فيه وطبعا ماقدرت أصور نهائيا..
أنا مادري عن الناس اللي جربوه..بس شخصيا ماراح أفكر أزوره مره ثانية..


مطعم شيك شاك..
كوول والله وبرجرهم لذيذ..وللأسف ماجربته الا مره وحده..
هو موجود في الامارات مول :)
أنصحكم فيه

وآخر قسم في الأكل هو جاليري لافاييت..
مأكولات جاهزة صورتها في الاوت ليت الفرنسي ..الموجود في دبي مول

والحين ننتقل للشوبنج..
صور منوعة صورتها في محلات دبي مول:

جاليريز لافاييت

علب الفاين عجبتني..أحس تنفع للمطابخ..خصوصا المطابخ الريفيه..لأن مثل ماانتو شايفين طاغي عليها اللون الاحمر والاخضر وبتشكيلة البليد plaid

Bloomigdale's

New York Collection

كان المحل فظيييع

يعني كله عالنيويورك ستايل..وكله سوالف نيوورك..وهالاشيا أموت فيها..لأن نيويورك بالنسبة لي حلم..

ا ن ت ه ى

دبي دانة الدنيا ♥

السلام عليكم

قررنا نقضي إجازة العيد في دبي,لأن الأجواء حلوة ودبي ماتتفوت بصراحه..رائعه من عدة نواحي,للاسترخاء,التسوق والاكل.

دبي فعلا تتطور بشكل كبير وملحوظ عند كل زياره لها..مثل المترو اللي يسهل التنقل بسعر ممتاز,والفنادق المميزة اللي توفر خدمات عاليه و راقية جدا وأغلب الفنادق تطل على مناظر خلابه وفظيعه :*)

وأيضا الشي اللي خلى دبي فعلا تتميز هي مجمعاتها اللي اجذبت الناس بشكل كبير, مجمعات فعلا ضخمة ومتوفر فيها كل شي وتتميز بالتنوع في محلاتها ومطاعمها وأشيا معينة ماتتوفر في باقي الخليج..

لذلك..لو نتم نتكلم عن دبي ماراح نخلص..

فعلا دبي صارت الحب للجميع ..وخصوصي لي أنا:P

و الفندق اللي سكنا فيه هو 

The Address Dubai Marina

حبيت أنوه أن الادرس عندهم 3 فنادق(دبي مول + الداون تاون)

فلازم الواحد ينتبه عالفندق اللي يحجز فيه ووين مكانه..لن احنا تحسبنا ان هذا اللي صوب دبي مول وطلع وايد بعيد عنه..قهر والله

لن هذي مش اول مره تصير هالحركة لنا...

من سنه بعد كنا نبي نحجز في القصر,وحجزنا في The Palace

وترى فرق السما و الأرض والفندقين مالهم خص..

فلازم تتأكدون من الحجز والمنطقه اللي تبغونها الف مره

صج هالحجز كان غلطة بس تجربة حلوة وكان الفندق يطل على مرسى دبي.

طبعا مثل ماذكرت قبل اني رحت في إجازة العيد, بصراحه هالشي مانصحكم فيه..لأن دبي ومجمعاتها وكل شي فيها مزدحمه بشكل ماتتصورونه..يعني المجمعات صعب جدا إنك تتمشى فيها بدون تدافع وتخبط بالناس..وحجوزات المطاعم صعب إنك تحصلها..وإذا بنطلع من مجمع ننتظر ساعه بس في الطابور عشان نركب التاكسي..فكانت مأساة ماحب أتذكرها!

فاضطرينا نقضي أيام العيد في الفندق(الاثنين و الثلاثا) لكن الحمدلله استغليت يوم الثلاثا بشكل مشوق جدا ورحت السبا اللي في الفندق..

The Address Spa

بصراحه هذي أول مره في حياتي أروح سبا..كانت تجربة جديده علي بس فظيعه ومريحه بشكل مو طبيعي..

أنا قررت أروح السبا لأن نفسيتي كانت وايد تعبانه من الجامعه ومن الامتحانات ودرجاتي اللي تضيق الخلق..

في السبا سكرت جوالي ونسيت الدنيا وقلت هال3 ساعات بقضيها مع نفسي بس ..وفعلا طول الوقت مغمضة عيوني ومريحه..

يعني حتى قلت إن شاء الله بعد نهاية هالكورس لازم أجرب السبا اللي عندنا في الدوحة..عشان أريح مخي :P

وبعد يوم السبا قضيت باقي الأيام في المجمعات :D :D

رحت دبي مول - مول الامارات و دبي مارينا مول بحكم انه في نفس الفندق اللي ساكنين فيه

وركبت الميترو وكان شي غريب بصراحه..بس مشكلة الميترو عندهم ان ماتختصر الوقت وايد..بسبب قلة المحطات..فيعني الواحد يمشي 10 دقايق عشان يوصل المحطة وعلى حسب مكان سكنه,وأيضا 5 دقايق مشي داخل المحطة نفسها!ومن 5 الى 10 دقايق في المترو نفسه!

فأحس سالفه شوي !.. لكن لو مثلا يوم من الايام سكنا في فندق قريب جدا من محطة المترو أكيد راح نخليه وسيله مواصلات لنا..لأنه بيكون أسرع ونفتك من زحمة الشوارع وأكيد أرخص!.. وحتى الميترو عندهم مقسم.. في قسم للنساء بس ..وعندهم نوعين للتذاكر .. Gold or Regular

ومحطاتهم والميترو نظاف ومرتبين..

وأخيرا..ركبنا فوق برج خليفة..وتعرفنا على تاريخ بناء البرج وراح أذكر الرحلة كاملة في مدونة ثانية.

..

صور تايم :D

من الفندق:

دبي مول & داون تاون:

فيديو للنوافير:

انتهى .